Depýtat Dáýlet Muqaevtyń aıtýynsha Astanadaǵy Bas meshit pen Haziret Sultan meshitinde janaza asyna arnalǵan dastarqan adam basyna 20 000 teńgege deıin jetedi. Mınımaldy baǵa 7000 teńgeden bastalady, biraq ol kezde etti ózińiz ákelýińiz kerek.
Bul jaǵdaı kópshiliktiń narazylyǵyn týdyryp otyr.
Sebebi elimizdiń Shyǵys Qazaqstan, Abaı, Pavlodar oblystarynda janaza asy qarapaıym uıymdastyrylyp, tek 7 túrli taǵamnan aspaıdy, al basqa taǵamdardy usynbaıdy.
Qazaq dástúrinde janaza asy – marqumǵa duǵa baǵyshtap, qaıǵyny bólisý úshin beriletin as. Biraq meshitterde baǵalardyń sharyqtaýy janaza asynyń toı dastarqanyna aınalǵanyn kórsetedi.
Depýtattyń aıtýynsha, Qazaqstan Musylmandary Dinı Basqarmasy (QMDB) bul máselege kóńil bólip, as berý mádenıetin retteýi tıis. Sebebi qaıǵydan qan jutyp otyrǵan jandarǵa mundaı baǵalar aýyr soqqy bolýy múmkin.
"Erte me, kesh pe, ár adam bul ómirden ótedi. Janaza, as berý, zırat kóterý – kez kelgen adamnyń aldynan shyǵatyn dinı joralǵylar. Biraq olardy oryndaý otbasyǵa aýyr qarjylyq júk bolmaýy tıis" dedi Dáýlet Muqaev.
