الماتى وبلىسىنداعى ي. نۇسىپباەۆ اتىنداعى مەكتەپ-ينتەرناتتا بالالار جارتىلاي قيراعان عيماراتتا تۇرىپ جاتىر، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستانداعى بالا قۇقىقتارى جونىندەگى ۋاكىل دينارا زاكيەۆا ءوزىنىڭ الەۋمەتتىك جەلىسىندە جازبا جاريالادى.
"كەشە الماتى وبلىسىندا "بالالار قورعاۋدا" قورىنىڭ جەتەكشىسى جاننا احمەتوۆامەن بىرگە ي. نۇسىپباەۆ اتىنداعى مەكتەپ-ينتەرناتىنداعى بالالاردىڭ ءومىر ءسۇرۋ جاعدايىن زەرتتەدىك. 6 جاستان اسقان 170 بالا ينتەرناتتا اۋىر جاعدايدا ءومىر ءسۇرىپ جاتىر. ءۇش جىل بۇرىن مەكەمەدە كۇردەلى جوندەۋ جۇمىستارى باستالعانىمەن، مەردىگەر ونى اياقتاماعان. سونىڭ سالدارىنان بالالار جارتىلاي قيراعان عيماراتتا تۇرۋعا ءماجبۇر. وقۋ كورپۋسىندا تۇنەپ، سپورتزالدا تاماقتانادى. ال سانيتارلىق-گيگيەنالىق نورمالار بۇزىلۋدا" - دەپ جازدى ول.
بالالار جونىندەگى ۋاكىلدىڭ ايتۋىنشا بۇل ماسەلەنى الماتى وبلىسىنىڭ اكىمى مارات سۇلتانعازيەۆپەن كەزدەسۋ بارىسىندا تالقىلاعان.
"اكىدىك جوندەۋ جۇمىستارىن اياقتاۋ نەمەسە جاڭا ينتەرنات سالۋ ماسەلەسىن قاراستىرعان. الايدا بالالاردى قازىرگى قيىن جاعدايدا قالدىرماي، ولاردى جاقىندا جوندەۋدەن وتكەن جانە بوس ورىندارى بار باسقا ينتەرناتقا كوشىرۋ تۋرالى شەشىم قابىلداندى" - دەپ جازدى دينارا زاكيەۆا.
