ءماجىلىس دەپۋتاتى نارتاي سارسەنعاليەۆتىڭ مالىمدەۋىنشە، ەندى ميكروتيا جانە ەستۋ جولىنىڭ اترەزياسى بار بالالار مەملەكەت ەسەبىنەن ەستۋ اپپاراتتارىمەن قامتاماسىز ەتىلەدى.
دەپۋتات 2023 جىلى ەستۋ قابىلەتى بۇزىلعان بالالارعا مەملەكەتتىك قولداۋ كورسەتۋ ماسەلەسىن كوتەرگەن بولاتىن. ونىڭ ايتۋىنشا، قازاقستاندا ءتورتىنشى دارەجەلى كەرەڭدىگى بار بالالار عانا مۇگەدەكتىك الىپ، مەملەكەتتەن تەگىن ەستۋ پروتەزدەرىن الۋ قۇقىعىنا يە. ال قالعان ءۇش ساناتتاعى بالالار مۇنداي كومەكتەن شەت قالىپ كەلگەن.
"بۇل ماسەلەنى بىرنەشە رەت تالقىلاپ، دوڭگەلەك ۇستەلدەر وتكىزدىك. اتا-انالارمەن كەزدەسكەندە، ولاردىڭ ەستۋ اپپاراتتارىن ساتىپ الۋ ءۇشىن نەسيە الۋعا ءماجبۇر بولعانىن بىلدىك. سونىمەن قاتار، مۇنداي بالالار ءجيى بۋللينگكە ۇشىراپ، مەكتەپكە بارۋدان باس تارتقان جاعدايلار دا كەزدەستى. وسى ماسەلەمەن ەكى جىل بويى اينالىسىپ، ناتيجەسىندە ميكروتيا جانە اترەزيا دياگنوزى قويىلعان بالالار مەن ەرەسەكتەردى جەرگىلىكتى بيۋدجەت ەسەبىنەن ەستۋ اپپاراتتارىمەن قامتاماسىز ەتۋ نورماسىن ەنگىزدىك", – دەدى دەپۋتات.
