2025 جىلى الماتىدا 20 000 ادامعا ارنالعان ەڭ ۇلكەن مەشىتتىڭ اشىلۋى جوسپارلانىپ وتىر، دەپ حابارلايدى «ادىرنا» ءتىلشىسى Ulysmedia.kz-كە سىلتەمە جاساپ.
2017 جىلدان بەرى سالىنىپ كەلە جاتقان عيبادات ورنى ورتالىق ازياداعى ەڭ ءىرى ءدىني كەشەندەردىڭ ءبىرى بولماق.
بۇل تاقىرىپ قوعامدا اقسۇلتان قاليەۆتىڭ الەۋمەتتىك جەلىدەگى جازباسىنان كەيىن قىزۋ تالقىلانا باستادى. ول الماتىداعى جۇما كۇنگى كولىك كەپتەلىسىنىڭ باستى سەبەپتەرىنىڭ ءبىرى رەتىندە قالاداعى مەشىتتەردىڭ ازدىعىن جانە ولاردىڭ تارلىعىن اتاپ ءوتتى. ونىڭ پىكىرىنشە، ءىرى مەشىتتەردىڭ جەتىسپەۋى، اسىرەسە ورتالىق اۋدانداردا، كوشەلەردىڭ شامادان تىس جۇكتەلۋىنە الىپ كەلەدى.
View this post on Instagram
“كۋليباەۆ مەشىتى” دەپ جاتىر
اقسۇلتان قاليەۆتىڭ جازباسىنداعى پىكىرلەردى زەردەلەسەك، كەيبىر قولدانۋشىلار جاڭا مەشىتتى “قۇلىباەۆ مەشىتى” دەپ اتاپ جاتىر. بۇل پىكىر قازاقستانداعى جەكەمەنشىك مەتسەناتتاردىڭ وسىنداي جوبالارعا قارجىلاي قولداۋ كورسەتۋىنىڭ قوعامدا قالاي قابىلداناتىنىن كورسەتەدى.
“حالىق” قايىرىمدىلىق قورىنىڭ ءباسپاسوز قىزمەتى بۇل مەشىتتىڭ كاسىپكەر تيمۋر قۇلىباەۆتىڭ جەكە قاراجاتىنا سالىنعانىن راستادى. قۇرىلىس تولىق اياقتالعاننان كەيىن عيبادات ورنى قازاقستان مۇسىلماندارى ءدىني باسقارماسىنىڭ (قمدب) قاراۋىنا بەرىلەدى.
جاڭا مەشىت قالالىق ينفراقۇرىلىمعا قالاي اسەر ەتەدى؟
جوبا بويىنشا:
جالپى كىلەم توسەلگەن اۋماق – 13 500 شارشى مەتر
جالپى سىيىمدىلىعى – 20 000 ادام
1 100 كولىككە ارنالعان اۆتوتۇراق
كىتاپحانا، 400 ادامعا ارنالعان ءىس-شارالار زالى
نەكە قيۋعا ارنالعان ارنايى ايماق
ساراپشىلاردىڭ پىكىرى ەكىگە ءبولىندى
اقسۇلتان قاليەۆتىڭ پىكىرىنشە، جاڭا مەشىت الماتىداعى قازىرگى مەشىتتەرگە جۇكتەمەنى ازايتىپ، قالا ارحيتەكتۋراسىنا ەرەكشە كورىك بەرەدى.
الايدا كەيبىر ۋربانيستەر مەشىتتىڭ ۇلكەن بولۋى كەپتەلىستى شەشۋگە كومەكتەسپەۋى مۇمكىن دەپ سانايدى. جۋرناليست-ۋربانيست الەكساندر لەۆين قالاداعى كولىك اعىنىن ءتيىمدى رەتتەۋ ءۇشىن جاياۋ جۇرگىنشىلەرگە قولايلى ينفراقۇرىلىم، كولىك لوگيستيكاسى جانە قوعامدىق كولىكتىڭ ءتيىمدى ۇيىمداستىرىلۋى ماڭىزدى ەكەنىن اتاپ ءوتتى.
جەرگىلىكتى بيلىك وكىلدەرى مەشىت اشىلعاننان كەيىن قالاداعى كولىك قوزعالىسىن مونيتورينگتەن وتكىزىپ، قاجەت بولعان جاعدايدا قوسىمشا جول-كولىك شارالارىن قابىلدايتىنىن حابارلادى.
