2025 jyly Almatyda 20 000 adamǵa arnalǵan eń úlken meshittiń ashylýy josparlanyp otyr, dep habarlaıdy «Adyrna» tilshisi Ulysmedia.kz-ke silteme jasap.
2017 jyldan beri salynyp kele jatqan ǵıbadat orny Ortalyq Azııadaǵy eń iri dinı keshenderdiń biri bolmaq.
Bul taqyryp qoǵamda Aqsultan Qalıevtiń áleýmettik jelidegi jazbasynan keıin qyzý talqylana bastady. Ol Almatydaǵy juma kúngi kólik keptelisiniń basty sebepteriniń biri retinde qaladaǵy meshitterdiń azdyǵyn jáne olardyń tarlyǵyn atap ótti. Onyń pikirinshe, iri meshitterdiń jetispeýi, ásirese ortalyq aýdandarda, kóshelerdiń shamadan tys júktelýine alyp keledi.
View this post on Instagram
“Kýlıbaev meshiti” dep jatyr
Aqsultan Qalıevtiń jazbasyndaǵy pikirlerdi zerdelesek, keıbir qoldanýshylar jańa meshitti “Qulybaev meshiti” dep atap jatyr. Bul pikir Qazaqstandaǵy jekemenshik meenattardyń osyndaı jobalarǵa qarjylaı qoldaý kórsetýiniń qoǵamda qalaı qabyldanatynyn kórsetedi.
“Halyq” qaıyrymdylyq qorynyń baspasóz qyzmeti bul meshittiń kásipker Tımýr Qulybaevtyń jeke qarajatyna salynǵanyn rastady. Qurylys tolyq aıaqtalǵannan keıin ǵıbadat orny Qazaqstan musylmandary dinı basqarmasynyń (QMDB) qaraýyna beriledi.
Jańa meshit qalalyq ınfraqurylymǵa qalaı áser etedi?
Joba boıynsha:
Jalpy kilem tóselgen aýmaq – 13 500 sharshy metr
Jalpy syıymdylyǵy – 20 000 adam
1 100 kólikke arnalǵan avtoturaq
Kitaphana, 400 adamǵa arnalǵan is-sharalar zaly
Neke qııýǵa arnalǵan arnaıy aımaq
Sarapshylardyń pikiri ekige bólindi
Aqsultan Qalıevtiń pikirinshe, jańa meshit Almatydaǵy qazirgi meshitterge júktemeni azaıtyp, qala arhıtektýrasyna erekshe kórik beredi.
Alaıda keıbir ýrbanıster meshittiń úlken bolýy keptelisti sheshýge kómektespeýi múmkin dep sanaıdy. Jýrnalıst-ýrbanıst Aleksandr Levın qaladaǵy kólik aǵynyn tıimdi retteý úshin jaıaý júrginshilerge qolaıly ınfraqurylym, kólik logıstıkasy jáne qoǵamdyq kóliktiń tıimdi uıymdastyrylýy mańyzdy ekenin atap ótti.
Jergilikti bılik ókilderi meshit ashylǵannan keıin qaladaǵy kólik qozǵalysyn monıtorıngten ótkizip, qajet bolǵan jaǵdaıda qosymsha jol-kólik sharalaryn qabyldaıtynyn habarlady.
