ماسكەۋدىڭ شىعىسىندا، ەلەكتروزاۆودسكايا كوشەسىندە ورنالاسقان بۇرىنعى ەلەكتروزاۆود عيماراتىندا ءىرى ءورت شىقتى، دەپ حابارلايدى "ادىرنا" ۇلتتىق پورتالى news.ru سايتىنا سىلتەمە جاساپ.
ماسكەۋ تجم مالىمەتىنشە، ورتكە مۇمكىن بولاتىن بەس دەڭگەيدىڭ ءتورتىنشىسى بەرىلگەن.
ءورتتىڭ وشاعى عيماراتتىڭ ەكىنشى قاباتىنان انىقتالعان. اعاش توسەمەلەردىڭ بولۋىنا بايلانىستى جالىن تەز تارالىپ، جالپى اۋماعى 800 شارشى مەتردى قامتىعان. عيماراتتىڭ ءۇشىنشى جانە ءتورتىنشى قاباتتارىنان قارا ءتۇتىن شىعىپ جاتقاندىعى حابارلاندى. كۋاگەرلەردىڭ ايتۋىنشا، ءورت باستالعان ساتتە عيمارات ىشىندە ادامدار قالىپ قويعان.
ءورت سوندىرۋشىلەر العاشقى مينۋتتاردا ءۇشىنشى قاباتتا كەمىندە 30 ادامنىڭ قامالىپ قالعانىن حابارلادى. ەكىنشى قابات تولىقتاي جالىنعا ورانىپ، ول جەردە تاعى 10 ادامنىڭ بولۋى مۇمكىن ەكەنى ايتىلدى. سونىمەن قاتار، Telegram-ارنالاردىڭ مالىمەتىنە سايكەس، جالپى سانى 50-دەن استام ادام عيمارات ىشىندە قالىپ قويعان. ونىڭ ىشىندە 30 ادام «روللەرارەنا» سكەيت-پاركىندە بولعان. كۋاگەرلەردىڭ ايتۋىنشا، سكەيت-پارككە كەلگەندەر ءبىر ەسىك تۇتىنگە تولىپ، ال ەكىنشىسىندە قۇلىپ بولعاندىقتان عيماراتتان شىعا الماي قالعان. سوڭىندا كەلۋشىلەر قۇلپى بار ەسىكتى بۇزىپ، قاراڭعى باسپالداق ارقىلى سىرتقا شىققان. بەسىنشى قاباتتاعى بي ستۋدياسىندا دا بىرنەشە بالانىڭ قامالىپ قالعان بولۋى مۇمكىن ەكەنى ايتىلدى.
ءورت شىققان عيماراتتان جالپى 90 ادام قۇتقارىلدى جانە 120 ادام وزدىگىنەن ەۆاكۋاتسيالاندى. قۇتقارۋ جۇمىستارىنا 60-تان استام ءورت ءسوندىرۋشى جانە 16 ارنايى تەحنيكا جۇمىلدىرىلدى. جوعارى قاباتتارداعى ادامداردى قۇتقارۋ ءۇشىن كوتەرگىش مەحانيزمدەر ورناتىلعان.
ءورت سوندىرۋشىلەردىڭ الدىن الا بولجامى بويىنشا، ءورتتىڭ شىعۋىنا ەلەكتر سىمدارىنىڭ اقاۋى نەمەسە جۇكتەمەنىڭ ارتۋى سەبەپ بولۋى مۇمكىن. ءورت كەزىندە سەگىز ادام زارداپ شەگىپ، تورتەۋى اۋرۋحاناعا جەتكىزىلگەن. ماسكەۋ دەنساۋلىق ساقتاۋ دەپارتامەنتىنىڭ مالىمەتىنشە، ءۇش ادام سكليفوسوۆسكي اتىنداعى عىلىمي-زەرتتەۋ ينستيتۋتىنا جاتقىزىلدى. ولاردىڭ بارلىعى تۇتىننەن ۋلانعان، دەگەنمەن دارىگەرلەر ولاردىڭ جاعدايىن اۋىر ەمەس دەپ باعالاۋدا.
ءورت كەزىندە قازا تاپقاندار تۋرالى اقپارات تۇسكەن جوق. وقيعاعا بايلانىستى ماسكەۋ تەرگەۋ كوميتەتى تەكسەرۋ جۇمىستارىن باستاعانىن حابارلادى.
