Máskeýdiń shyǵysynda, Elektrozavodskaıa kóshesinde ornalasqan burynǵy Elektrozavod ǵımaratynda iri órt shyqty, dep habarlaıdy "Adyrna" ulttyq portaly news.ru saıtyna silteme jasap.
Máskeý TJM málimetinshe, órtke múmkin bolatyn bes deńgeıdiń tórtinshisi berilgen.
Órttiń oshaǵy ǵımarattyń ekinshi qabatynan anyqtalǵan. Aǵash tósemelerdiń bolýyna baılanysty jalyn tez taralyp, jalpy aýmaǵy 800 sharshy metrdi qamtyǵan. Ǵımarattyń úshinshi jáne tórtinshi qabattarynan qara tútin shyǵyp jatqandyǵy habarlandy. Kýágerlerdiń aıtýynsha, órt bastalǵan sátte ǵımarat ishinde adamdar qalyp qoıǵan.
Órt sóndirýshiler alǵashqy mınýttarda úshinshi qabatta keminde 30 adamnyń qamalyp qalǵanyn habarlady. Ekinshi qabat tolyqtaı jalynǵa oranyp, ol jerde taǵy 10 adamnyń bolýy múmkin ekeni aıtyldy. Sonymen qatar, Telegram-arnalardyń málimetine sáıkes, jalpy sany 50-den astam adam ǵımarat ishinde qalyp qoıǵan. Onyń ishinde 30 adam «RollerArena» skeıt-parkinde bolǵan. Kýágerlerdiń aıtýynsha, skeıt-parkke kelgender bir esik tútinge tolyp, al ekinshisinde qulyp bolǵandyqtan ǵımarattan shyǵa almaı qalǵan. Sońynda kelýshiler qulpy bar esikti buzyp, qarańǵy baspaldaq arqyly syrtqa shyqqan. Besinshi qabattaǵy bı stýdııasynda da birneshe balanyń qamalyp qalǵan bolýy múmkin ekeni aıtyldy.
Órt shyqqan ǵımarattan jalpy 90 adam qutqaryldy jáne 120 adam ózdiginen evakýaııalandy. Qutqarý jumystaryna 60-tan astam órt sóndirýshi jáne 16 arnaıy tehnıka jumyldyryldy. Joǵary qabattardaǵy adamdardy qutqarý úshin kótergish mehanızmder ornatylǵan.
Órt sóndirýshilerdiń aldyn ala boljamy boıynsha, órttiń shyǵýyna elektr symdarynyń aqaýy nemese júktemeniń artýy sebep bolýy múmkin. Órt kezinde segiz adam zardap shegip, tórteýi aýrýhanaǵa jetkizilgen. Máskeý densaýlyq saqtaý departamentiniń málimetinshe, úsh adam Sklıfosovskıı atyndaǵy ǵylymı-zertteý ınstıtýtyna jatqyzyldy. Olardyń barlyǵy tútinnen ýlanǵan, degenmen dárigerler olardyń jaǵdaıyn aýyr emes dep baǵalaýda.
Órt kezinde qaza tapqandar týraly aqparat túsken joq. Oqıǵaǵa baılanysty Máskeý tergeý komıteti tekserý jumystaryn bastaǵanyn habarlady.
