جەلى ارقىلى كوپكە تانىمال يمام نۇرلان بايجىگىتۇلى اقش استاناسى ۆاشينگتوندا اق ءۇيدىڭ قايىرىمدىلىق تاڭعى اسىنا قاتىستى. بۇل تۋرالى ءوزىنىڭ الەۋمەتتىك جەلىدەگى پاراقشاسىندا ءبولىستى, دەپ حابارلايدى “ادىرنا” ۇلتتىق پورتالى.
«امەريكا قۇراما شتاتتارىنىڭ ۆاشينگتونداعى قايىرىمدىلىق تاڭعى اسقا كەلىپ وتىرمىن…مىڭداعان ادام. تۋرا مىنا جەردە اقش پرەزيدەنتى سويلەيدى. تۋرا پرەزيدەنتتىڭ الدىندا يمامدارىڭىز وتىر»، – دەدى نۇرلان يمام.
سونداي-اق، ول ترامپتىڭ شارا بارىسىندا سويلەگەن ءسوزى ەرەكشە اسەر ەتكەنىن ايتتى.
«امەريكا قۇراما شتاتتارىنىڭ 45-ءشى جانە 47-ءشى پرەزيدەنتى دونالد ترامپ مىرزا قايىرىمدىلىق شارادا ءسوز سويلەدى. «قۇدايىم مەنى اتقان ادامعا ولتىرتپەي، سىزدەردىڭ الدارىڭىزعا شىعارۋى، بۇل ەلىم ءۇشىن سىي ءارى مەنىڭ كوپ دۇنيەنى جاقسى جاعىنا وزگەرتۋىمە سەبەپ» دەپ ايتتى. بۇل ءسوزىن ۆاشينگتوندا تاپ مەنىڭ الدىمدا ايتقانى ماعان ۇلكەن اسەر بەردى. وتىرعان ورنىم دا تۋرا الدىنا تۇسكەن ەكەن. قاسىمدا ارمەنيا، كوسوۆو، ۋكراينا جانە ت.ب. مەملەكەت پرەزيدەنتتەرى وتىردى»، – دەپ جازدى نۇرلان بايجىگىتۇلى.
ايتا كەتسەك، ءداستۇر بويىنشا جىل سايىن اقپان ايىندا ۆاشينگتوندا كاسىپكەرلەر، ساياساتكەرلەر جانە شەتەلدىك قوناقتاردىڭ قاتىسۋىمەن قايىرىمدىلىق اس وتەدى. ونى ەڭ العاش رەت 1953 جىلى اقش-تىڭ 34-ءشى پرەزيدەنتى دۋايت ەيزەنحاۋەر ۇيىمداستىرعان بولاتىن.
