شىمكەنتتە 20 كۇن بۇرىن ءىز-ءتۇسسىز جوعالىپ كەتكەن 20 جاستاعى بايدىبەك ەدىلبەك ءولى كۇيىندە تابىلدى، دەپ حابارلايدى "ادىرنا" ۇلتتىق پورتالى.
بۇل تۋرالى شىمكەنت قالاسىنىڭ پوليتسيا دەپارتامەنتى رەسمي مالىمدەدى.
قۇزىرلى ورگان وكىلدەرىنىڭ حابارلاۋىنشا، جوعالعان ازاماتتىڭ ولىمىنە قاتىستى قىلمىستىق ءىس قوزعالىپ، قاجەتتى تەرگەۋ شارالارى جۇرگىزىلىپ جاتىر. الدىن الا مالىمەتكە سايكەس، مارقۇمنىڭ دەنەسىندە قانداي دا ءبىر زورلىق-زومبىلىق بەلگىلەرى انىقتالماعان.
بايدىبەك ەدىلبەك 14 قاڭتار كۇنى تۇركىستان وبلىسى، شۇبارسۋ اۋىلىنان شىمكەنت قالاسىنا كولىك قۇجاتىن الۋ ءۇشىن كەلگەن. ول دوسىن اۋەجايعا شىعارىپ سالىپ، سول كۇنى تۇسكى ۋاقىتتا اكەسىمەن سويلەسكەن سوڭ بايلانىس ۇزىلگەن. سوڭعى تەلەفون قوڭىراۋىندا جىگىت اۋىلعا قايتىپ بارا جاتقانىن ايتقان.
سول ساتتەن باستاپ ونىڭ قايدا ەكەنى بەلگىسىز بولىپ، جاقىندارى دابىل قاقتى. الايدا ىزدەۋ جۇمىستارى ناتيجە بەرمەي، وتباسى پوليتسيا قىزمەتكەرلەرىنىڭ جۇمىسىنا كوڭىلى تولمايتىنىن مالىمدەگەن ەدى.
ۇزاق ۋاقىت بويى ەشقانداي ناتيجە بولماعان سوڭ، ەرىكتىلەر توپتارى دا بايدىبەكتى ىزدەۋگە كىرىسكەن. وكىنىشكە قاراي، ولار جاس جىگىتتى كوشەلەردىڭ بىرىندە ءولى كۇيىندە تاپتى. الدىن الا مالىمەت بويىنشا، ول ءوز-وزىنە قول جۇمساعان.
قازىرگى تاڭدا تەرگەۋ امالدارى جالعاسىپ جاتىر. وقيعانىڭ بارلىق ءمان-جايى انىقتالعان سوڭ، قوسىمشا اقپارات بەرىلەدى.
