20 künnen keiın. Şymkentte joǧalǧan jıgıt ölı küiınde tabyldy

Şymkentte 20 kün būryn ız-tüssız joǧalyp ketken 20 jastaǧy Bäidıbek Edılbek ölı küiınde tabyldy, dep habarlaidy "Adyrna" ūlttyq portaly. Būl turaly Şymkent qalasynyŋ polisiia departamentı resmi mälımdedı. Qūzyrly organ ökılderınıŋ habarlauynşa, joǧalǧan azamattyŋ ölımıne qatysty qylmystyq ıs qozǧalyp, qajettı tergeu şaralary jürgızılıp jatyr. Aldyn ala mälımetke säikes, marqūmnyŋ denesınde qandai da bır zorlyq-zombylyq belgılerı anyqtalmaǧan. Bäidıbek Edılbek 14 qaŋtar künı Türkıstan oblysy, Şūbarsu auylynan Şymkent qalasyna kölık qūjatyn alu üşın kelgen. Ol dosyn äuejaiǧa şyǧaryp salyp, sol künı tüskı uaqytta äkesımen söilesken soŋ bailanys üzılgen. Soŋǧy telefon qoŋyrauynda jıgıt auylǧa qaityp bara jatqanyn aitqan. Sol sätten bastap onyŋ qaida ekenı belgısız bolyp, jaqyndary dabyl qaqty. Alaida ızdeu jūmystary nätije bermei, otbasy polisiia qyzmetkerlerınıŋ jūmysyna köŋılı tolmaitynyn mälımdegen edı. Ūzaq uaqyt boiy eşqandai nätije bolmaǧan soŋ, erıktıler toptary da Bäidıbektı ızdeuge kırısken. Ökınışke qarai, olar jas jıgıttı köşelerdıŋ bırınde ölı küiınde tapty. Aldyn ala mälımet boiynşa, ol öz-özıne qol jūmsaǧan. Qazırgı taŋda tergeu amaldary jalǧasyp jatyr. Oqiǧanyŋ barlyq män-jaiy anyqtalǧan soŋ, qosymşa aqparat berıledı.