عىلىم جانە جوعارى ءبىلىم ءمينيسترى ساياسات نۇربەك عىلىمي قىزمەتكەرلەردىڭ ەڭبەكاقىسى توڭىرەگىندەگى داۋعا جاۋاپ بەردى، دەپ حابارلايدى "ادىرنا" ۇلتتىق پورتالى Kazinform-عا سىلتەمە جاساپ.
قر پرەزيدەنتى جانىنداعى ۇلتتىق عىلىم اكادەمياسىنىڭ جاس عالىمدار كەڭەسى 2025 جىلدىڭ 5 قاڭتارىندا كۇشىنە ەنگەن عىلىمي قىزمەتكەرلەردىڭ ەڭبەكاقى تولەۋ قاعيدالارىنا قارسىلىق ءبىلدىردى. بۇل تۋرالى ۇيىم الەۋمەتتىك جەلىدە جاريالاپ، جازباعا 100-گە جۋىق پىكىر قالدىرىلدى.
ۇلتتىق عىلىم اكادەمياسىنىڭ جاس عالىمدار كەڭەسىنىڭ توراعاسى ماقسات جاباعيننىڭ ايتۋىنشا، جاڭا قاعيدالار بۇرىنعى جۇيەگە قاراعاندا ءتيىمسىز. بۇعان دەيىن عالىمدار گرانتتىق نەمەسە باعدارلامالىق-نىسانالى قارجىلاندىرۋ اياسىندا عىلىمي قىزمەتكەرلەردىڭ ەڭبەكاقىسىن جوبانىڭ عىلىمي جەتەكشىسى ءوزى بولەتىن. بۇل ءتاسىل جۇمىستىڭ كۇردەلىلىگىنە، اۋقىمىنا جانە ءاربىر زەرتتەۋشىنىڭ ناقتى ۇلەسىنە بايلانىستى جۇرگىزىلەتىن.
"جاڭا قاعيدالار ەڭبەكاقى مولشەرىن بىرىڭعاي بەلگىلەۋدى قاراستىرادى. بۇل – وتاندىق عىلىمداعى بيۋروكراتيانىڭ ارتۋىنىڭ بەلگىسى. عىلىمعا قاتىستى كەز كەلگەن رەفورما عالىمداردىڭ وزىمەن اقىلداسىپ جۇرگىزىلۋى ءتيىس", - دەدى ماقسات جاباعين.
جاس عالىمدار كەڭەسى مينيسترلىك بەكىتكەن №592 قاعيدالارى عىلىم سالاسىنداعى ەڭ تومەنگى ەڭبەكاقى دەڭگەيى رەتىندە قابىلدانۋى قاجەت دەپ ەسەپتەيدى. الايدا، ەڭ جوعارى ەڭبەكاقى مولشەرىنە شەكتەۋ قويىلماۋى ءتيىس. عىلىمي جوبالار مەن باعدارلامالار جەتەكشىلەرى بەكىتىلگەن عىلىمي ءوتىنىم بيۋدجەتى شەڭبەرىندە ەڭ جوعارى ەڭبەكاقى مولشەرىن وزدەرى انىقتاۋى كەرەك.
قر عىلىم جانە جوعارى ءبىلىم ءمينيسترى ساياسات نۇربەك بۇل ماسەلە بويىنشا پىكىر ءبىلدىرىپ، جاڭا نورمانىڭ قايتا قارالاتىنىن ايتتى.
"وتكەن اپتادا ءبىز عىلىمي-زەرتتەۋ ينستيتۋتتارىنىڭ باسشىلارىمەن، جاس عالىمدارمەن بىرنەشە سەسسيا وتكىزدىك. بارلىق ۇسىنىستار جينالدى. كەلەسى اپتادا بۇيرىققا وزگەرىستەر ەنگىزىلەدى. قارجىلاي شەكتەۋ الىنىپ، جاڭا بۇيرىق شىعادى. سونىمەن قاتار، جاڭا بايقاۋلارعا وسى وزگەرىستەر ەسكەرىلەدى", - دەدى مينيستر.
وسىلايشا، عىلىمي قىزمەتكەرلەردىڭ ەڭبەكاقىسىنا قاتىستى قاعيدالار قايتا قارالىپ، وزگەرىستەر ەنگىزىلەتىنى بەلگىلى بولدى.
