Ǵylym jáne joǵary bilim mınıstri Saıasat Nurbek ǵylymı qyzmetkerlerdiń eńbekaqysy tóńiregindegi daýǵa jaýap berdi, dep habarlaıdy "Adyrna" ulttyq portaly Kazinform-ǵa silteme jasap.
QR Prezıdenti janyndaǵy Ulttyq ǵylym akademııasynyń Jas ǵalymdar keńesi 2025 jyldyń 5 qańtarynda kúshine engen ǵylymı qyzmetkerlerdiń eńbekaqy tóleý qaǵıdalaryna qarsylyq bildirdi. Bul týraly uıym áleýmettik jelide jarııalap, jazbaǵa 100-ge jýyq pikir qaldyryldy.
Ulttyq ǵylym akademııasynyń Jas ǵalymdar keńesiniń tóraǵasy Maqsat Jabaǵınniń aıtýynsha, jańa qaǵıdalar burynǵy júıege qaraǵanda tıimsiz. Buǵan deıin ǵalymdar granttyq nemese baǵdarlamalyq-nysanaly qarjylandyrý aıasynda ǵylymı qyzmetkerlerdiń eńbekaqysyn jobanyń ǵylymı jetekshisi ózi bóletin. Bul tásil jumystyń kúrdeliligine, aýqymyna jáne árbir zertteýshiniń naqty úlesine baılanysty júrgiziletin.
"Jańa qaǵıdalar eńbekaqy mólsherin biryńǵaı belgileýdi qarastyrady. Bul – otandyq ǵylymdaǵy bıýrokratııanyń artýynyń belgisi. Ǵylymǵa qatysty kez kelgen reforma ǵalymdardyń ózimen aqyldasyp júrgizilýi tıis", - dedi Maqsat Jabaǵın.
Jas ǵalymdar keńesi mınıstrlik bekitken №592 qaǵıdalary ǵylym salasyndaǵy eń tómengi eńbekaqy deńgeıi retinde qabyldanýy qajet dep esepteıdi. Alaıda, eń joǵary eńbekaqy mólsherine shekteý qoıylmaýy tıis. Ǵylymı jobalar men baǵdarlamalar jetekshileri bekitilgen ǵylymı ótinim bıýdjeti sheńberinde eń joǵary eńbekaqy mólsherin ózderi anyqtaýy kerek.
QR Ǵylym jáne joǵary bilim mınıstri Saıasat Nurbek bul másele boıynsha pikir bildirip, jańa normanyń qaıta qaralatynyn aıtty.
"Ótken aptada biz ǵylymı-zertteý ınstıtýttarynyń basshylarymen, jas ǵalymdarmen birneshe sessııa ótkizdik. Barlyq usynystar jınaldy. Kelesi aptada buıryqqa ózgerister engiziledi. Qarjylaı shekteý alynyp, jańa buıryq shyǵady. Sonymen qatar, jańa baıqaýlarǵa osy ózgerister eskeriledi", - dedi mınıstr.
Osylaısha, ǵylymı qyzmetkerlerdiń eńbekaqysyna qatysty qaǵıdalar qaıta qaralyp, ózgerister engiziletini belgili boldy.
