ورالدا كوشەدە كەتىپ بارا جاتقان ەر ادامعا كىرپىش قۇلاپ، مەرت بولدى

ورالدا جاڭادان سالىنىپ جاتقان تۇرعىن ءۇيدىڭ ۇستىنەن قۇلاعان كىرپىشتىڭ سوققىسىنان ەر ادام كوز جۇمدى، دەپ حابارلايدى "ادىرنا" ۇلتتىق پورتالى mgorod.kz-كە سىلتەمە جاساپ.  قايعىلى وقيعا 29 قاڭتار كۇنى مولداعۇلوۆا كوشەسىندەگى توعىز قاباتتى تۇرعىن ءۇيدىڭ جانىندا بولعان. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنىڭ مالىمەتىنشە، جەدەل جاردەم قىزمەتىنە شاقىرتۋ 15:03-تە تۇسكەن. قۇرىلىس جۇمىستارى جۇرگىزىلىپ جاتقان كەزدە، 60-65 جاس شاماسىنداعى ەر ادام ءۇيدىڭ جانىنان ءوتىپ بارا جاتقاندا، باسىنا بيىكتەن كىرپىش قۇلاعان. ول العان جاراقاتىنان وقيعا ورنىندا كوز جۇمعان. باتىس قازاقستان وبلىستىق پوليتسيا دەپارتامەنتى وقيعا بويىنشا قىلمىستىق ءىس تىركەلگەنىن راستادى. "اتالعان فاكتى بويىنشا قىلمىستىق ءىس قوزعالدى. تەرگەۋ جۇرگىزىلۋدە", – دەپ حابارلادى پوليتسيا وكىلدەرى.