اسكەردە جۇمباق جاعدايدا باسى جارىلىپ، توسەك تارتىپ قالعان ەربايان مۇحتار تۇركيادا العاشقى ەمدەۋ كەزەڭىن اياقتاپ، قازاقستانعا قايتتى. بۇل تۋرالى قۇقىق قورعاۋشى ينگا يمانباي ءوزىنىڭ Instagram پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
"ەرباياننىڭ باسىنا جاسالعان وتادان كەيىن تولىققاندى رەابيليتاتسيا باستاۋ ءۇشىن ونىڭ اعزاسى ءبىراز ۋاقىت دەمالۋى كەرەك ەكەن. كوكتەمدە ول تۇركياعا قايتا ۇشىپ، ەكىنشى كەزەڭ – رەابيليتاتسيانى باستايدى. جۋىردا ەرباياننىڭ اتا-اناسى ءبىرىنشى كەزەڭدەگى ەمگە كەتكەن قارجى بويىنشا ەسەپ بەرەدى", – دەدى ينگا يمانباي جەلىدەگى پاراقشاسىندا.
ەسكە سالساق، ەربايان مۇحتار ۇلتتىق ۇلاندا مەرزىمدى اسكەري قىزمەتتە ءجۇرىپ جارالانعان. الماتىداعى ۇلتتىق ۇلاننىڭ 5571 بولىمىندە بىلتىر قۇلاپ، كوماعا تۇسكەن، بيىل ساۋىردە ويانعان ساربازدى تۋعان-تۋىستارى استاناعا جەتكىزە الماعان ەدى.
اسكەري ءبولىم «سارباز دارەتحانادا ءوزى قۇلاپ، باسىن كافەلگە سوعىپ الدى» دەگەن. ەربايان مۇحتاردىڭ اكەسى دە، شەشەسى دە بۇل نۇسقاعا سەنبەيدى.
ەربايان مۇحتاردى تۇركياعا قورعانىس مينيسترلىگىنىڭ ارنايى بورتىمەن جەتكىزىلدى. سارباز ىستانبۇلعا امان-ەسەن جەتىپ، “مەديكال-پارك” كلينيكاسىنا جاتقىزىلعان. ول دارىگەرلەردىڭ قاراۋىندا قاجەتتى ەم قابىلداپ جاتىر.