اپاتتا نەگە دايىن بولۋ كەرەك؟ لوس-اندجەلەستەگى قازاق راديوعا دىلگىر بولعانىن ايتتى

3567
Adyrna.kz Telegram

امەريكانىڭ لوس-اندجەلەس ايماعىندا بولىپ جاتقان ءورت ادامداردىڭ ءبىرىنشى كەزەكتە نەگە دايىن بولۋى كەرەكتىگىن كورسەتتى. بۇل وقيعا الداعى ىقتيمال اپاتتارعا ساباق بولسا كەرەك.

2025 جىلدىڭ 7 قاڭتارىندا لوس-اندجەلەس وكرۋگىندە بىرنەشە تابيعي ءورت باستالدى. سالدارىنان ون مىڭداعان ادام ەۆاكۋاتسيالانىپ، بىرنەشە ادام قازا تاپتى، ال ەكولوگيا مەن مۇلىككە كەلتىرىلگەن زيان ميللياردتاعان دوللارعا باعالاندى.

نە بولدى؟

7 قاڭتاردان باستاپ، لوس-اندجەلەس وكرۋگىندە ءورت باستالدى. بەيسەنبى كۇنى جاعداي بويىنشا مىڭداعان ۇيلەر مەن باسقا عيماراتتار جانىپ، 135 مىڭنان استام ادام ەۆاكۋاتسيالاندى، كەمىندە 5 ادام قازا تاپقانى تۋرالى اقپارات تاراعان. ەلەكتر ەنەرگياسى مەن سۋمەن جابدىقتاۋ كوپتەگەن اۋدانداردا ءوشىرىلدى. 7 قاڭتاردا باستالعان ورتتەن بەرى 28 ادام قازا تاۋىپ، 16 مىڭعا جۋىق عيمارات زاقىمدانعان.

تۇرعىننىڭ جازباسى

لوس-اندجەلەستە تۇراتىن قازاق، ءوز ماماندىعى جۋرناليست ساكەن قايىربەرگەنۇلى 13 قاڭتار كۇنى Facebook جەلىسىندە ءورت تۋرالى اقپارات جاريالادى.

«اپاتتىڭ سۇمدىق سالدارى ەندى جاريالانا باستادى. ءورت كەزىندە شۇعىل كەتۋگە ءماجبۇر بولعان تۇرعىندار ءۇي-جايلارىنا ەندى ورالىپ، وكىنىشكە وراي، باسىم بولىگى، ورنىن سيپاپ قالدى.  پسيحولوگيالىق جاعداي مۇشكىل.

مەديا تانىمال گولليۆۋد تۇلعالارىنىڭ تاعدىرىن تالقىلاپ الەك. مەلل گيبسون، ەنتوني حوپكينس، تاعى باسقا كينوگەرلەر، باسقا دا شوۋ-بيز وكىلدەرى ميلليونداعان دوللارعا باعالانعان ءزاۋلىم سارايلارىنان ايىرىلىپتى.  اتاقتىلار نەگىزىنەن، Palisades اۋدانىندا قونىستانعان. ەڭ اۋقىمدى ءورت سول جاقتا بولدى. دەگەنمەن،  جالىن ەشكىمدى دە ايامادى. ءبارىن تەڭەستىردى.

Eaton ءورتى جالماعان Altadena قالاسى، ءوزىم كۇنارا ەرسىلى-قارسىلى وتەتىن بولعاسىن، تانىس اۋدان. بۇل تاۋ ەتەگىندەگى بايىرعى تۇرعىندار اۋدانى. كوشەسى دە، اۋاسى دا تازا، ناعىز ەڭبەكقور جاندار تۇراتىن، كوبىنە بالالى وتباسىلار شوعىرلانعان جەر. توڭىرەكتە جەر ۇيلەر، تومەن قاباتتى عيماراتتار باسىم.  التادينا - پاسادينانىڭ جالعاسى. لوس اندجەلەستەن ءسال قاشىق بۇل قالالاردىڭ ءوز اكىمشىلىگى، دەربەس پوليتسيا جانە ءورت ءسوندىرۋ قىزمەتتەرى بار.

اۋەدەن تۇسىرىلگەن ورتتەن كەيىنگى كادرلار تۇتاستاي كورشىلەس كوشە بلوكتارىنىڭ دىمى قالماي،جانىپ كەتكەنىن كورسەتتى. تىپ-تيپىل. سورايعان باعانالار دا سيرەك.  “قالايشا ءۇيدىڭ تۇگى قالماعان؟” دەپ تاڭىرقايتىن بولارسىز… شىندىعىندا، ۇيلەردىڭ بارلىعى دەرلىك، اعاشتان تۇرعىزىلعان. يا، كەي ۇيلەردىڭ تۇعىرىنا، نە كوپ قاباتتى ۇيلەردىڭ كونسترۋكتسياسىنا بەتون پايدالانادى. ال قابىرعا (ىشكى-سىرتقى ), باسقا دا بولىكتەرىنە قولدانىلاتىن نەگىزگى ماتەريال - اعاش. ۇيلەردىڭ باسىم بولىگى ەسكى.  وت تيگەندە، شىرپىداي لاۋلاپ، توقتاۋسىز جانۋىنىڭ ءبىر سەبەبى سودان. اعاش، ارينە تىم ارزان دا ماتەريال ەمەس. دەگەنمەن، ءۇي باعاسىنا اسەر ەتەتىن، نەگىزىنەن - جەر قۇنى.  

اعاش، ەكولوگيالىق جايلى ماتەريال. ءارى (!), كاليفورنيانىڭ تاعى ءبىر قاتەرى - جەر سىلكىنىسى سالدارىن مەيلىنشە ازايتۋعا، ءتيىمدى دەسەدى…» - دەپ جازدى ول.

ودان بولەك، لوس-اندجەلەستەگى قازاقتىڭ جازباسىندا:

«ەندى ءورتتىڭ نەدەن شىققانى تۋرالى تانىمال نۇسقالارعا توقتالايىق. قىس ۋاقىتىندا وڭتۇستىك كاليفورنيانى مازالايتىن سانتا انا وكپەك جەلى  سوعاتىنى تۋرالى مەتەورولوگتار ەسكەرتپەسى اپاتتان ءۇش كۇن بۇرىن تارالدى. بىراق، ءورت قاۋپى تۋرالى، بولجام ايتىلمادى.

قىسقا سيپاتتاما: جەل، سەيسەنبى، 7 قاڭتاردا تاڭەرتەڭ كوتەرىلدى. كۇشى بىرتىندەپ ەسەلەندى. تۇسكە قاراي Pacific Palisades اۋدانىندا ءورت شىققانى تۋرالى حابار تاراي باستادى.

تۇستەن كەيىن جەل داۋىلعا اينالدى. ءبىر ساتتە قارقىنى تىم قاتتى بولعانى سونداي، اعاشتار قۇلاپ، شاتىر جابىندىلارىن اسپانعا كوتەردى. توڭىرەك استان-كەستەن بولدى. بۇل تۇسكى 4.30 شاماسى بولاتىن.

تىسقا شىققانىمدا، شارباقتىڭ ءبىر بولىگى جۇلىنىپ تۇسكەنىن كوردىم. كورشىلەردىڭ كومەگىمەن، قورشاۋدى كەرى سۇيرەپ جۇرگەن ساتتە، قالقايىپ كورىنىپ تۇرعان تاۋ جوتاسى بويىمەن (سان گابريەل تاۋىنىڭ ءبىر سىلەمى), ءورت لاۋلاپ جاتقانىن اڭعاردىق…

قاتتى داۋىلدان ەلەكتر جەلىسى ءۇزىلىپ، ودان كەيىنگى 27 ساعاتتاي ۋاقىت، قۋات بولمادى.

ءموبيلدى ينتەرنەت، قۋات بولماسا (تەلەفون باتارەياسى وتىرسا), تەز سونەدى.  ەڭ ءتيىمدى گادجەت - بايىرعى ءپورتاتيۆتى راديوقابىلداعىش ەكەن. بار اقپاراتتى قوعامدىق راديودان تىڭدادىم.

تاۋ تۇنىمەن جاندى. جەل باعىتىمەن وت ىعىسىپ، Pasadena, سوسىن،Sierra Madre سەكىلدى تاۋ ەتەگىندەگى باسقا قالالار باعىتىندا تاراپ جاتتى. بۇگىندە  تاۋدىڭ تەرىسكەيىنە ويىسىپ، قازىر سوندىرۋشىلەر باعىندىرۋعا بار كۇشىن جۇمساۋدا.

سونىمەن، الاپات ورتكە سەبەپشى - سانتا انا جەلى دەگەن ۆەرسيا بار. وتتىڭ تۇتانۋىنا تىكەلەي نە تۇرتكى بولعانى بەلگىسىز. تەرگەۋشىلەر، ەلەكتر جەلىسى تۇيىقتالعان دەگەن جورامالدى تەكسەرۋدە. قۋات تاسىمالداۋشى كومپانياعا (Southern California Edison Company) قاتىستى سوتقا ارىز دا تۇسكەن»، - دەپ جازدى ساكەن قايىربەرگەنۇلى.

سونداي-اق، ول نايزاعاي، جاڭا جىلدىق وتشاشۋ، كليماتتىق احۋال دەپ بىرنەشە نۇسقانى دا ۇسىنعان.

«جۇت - جەتى اعايىندى. بۇل ءورتتىڭ شىعىنىن ەسەپتەۋدىڭ ءوزى ايلارعا سوزىلاتىن سياقتى. شىعىندى كىم وتەيدى؟ ەشكىمنىڭ جاۋاپ بەرۋگە جۇرەگى داۋالاماي كۇيىپ تۇرعان سۇراق وسى قازىر. بىرقاتار ساقتاندىرۋ كومپانيالارى ءورت باستالعان ساتتە، اۋقىمىن اڭعارىپ، ءوز شارتتارىن شۇعىل وزگەرتۋگە ارەكەتتەنسە كەرەك. كاليفورنيا پروكۋراتۋراسى ساقتاندىرۋشىلارعا شارتتى وزگەرتۋگە، باعانى كوتەرۋگە تىيىم سالاتىن موراتوري قابىلدادى.

تاعى ءبىر تىيىم - باعانى ون پايىزدان جوعارى كوتەرۋگە جول بەرمەۋ تۋرالى شەشىم. بۇل كەز-كەلگەن ونىمگە، ازىق-تۇلىككە، قىزمەت تۇرلەرىنە قاتىستى. توتەنشە جاعداي كەزىندە اسىرا پايدا تاپقىسى كەلەتىن بيزنەس جاۋاپقا تارتىلاتىنى ەسكەرىلدى…» - دەلىنگەن لوس-اندجەلەستەگى قازاق ءجۋرناليسىنىڭ جازباسىندا.

الداعى قاۋىپ - جاڭبىر

لوس-اندجەلەستە الداعى ۋاقىتتا جاڭبىر جاۋىپ، سەل ءجۇرۋى مۇمكىن. قالالىق كەڭەسىنىڭ مۇشەسى ترەيسي پاركس ورتتەن قالعان زاتتاردىڭ جاڭبىر سۋىمەن بىرگە لاستانۋعا سەبەپ بولۋى مۇمكىن ەكەنىن ەسكەرتكەن.

«ءورت عيماراتتاردى، كولىكتەردى، ەلەكترونيكانى، پلاستيك پەن جيھازدى جويدى. بۇل جاڭبىر كەزىندە جاعالاۋعا اعىپ كەتەتىن توكسيكالىق قوسپالارعا اكەلۋى مۇمكىن»، - دەپ حابارلاعان.

سونىمەن قاتار، بيلىك سەل مەن كوشكىننىڭ الدىن الۋ ءۇشىن Pacific Coast Highway بويىندا بەتون توسقاۋىلدار ورناتىپ، جاعالاۋداعى اۋماقتاردى نىعايتۋمەن اينالىسۋدا. جاڭبىر سۋىن تازارتۋ جانە ونىڭ اعىسىن باسەڭدەتۋ ءۇشىن ارنايى جامىلعىلار مەن سابان توسقاۋىلدار قولدانىلۋدا.  

فاكتى مە، فەيك پە؟

باق بەتىندە گولليۆۋد بەلگىسىنىڭ ورتەنگەنى تۋرالى اقپارات تاراپ، الەمدى ءدۇر سىلكىندىرگەن بولاتىن. الايدا X الەۋمەتتىك جەلىسىنىڭ قولدانۋشىلارى لوس-اندجەلەستەگى ايگىلى گولليۆۋد بەلگىسىنىڭ ورتەنگەنى تۋرالى تاراعان سۋرەتتەردىڭ شىندىققا جاناسپايتىنىن جانە بۇل سۋرەتتەر جاساندى ينتەللەكت ارقىلى جاسالعانىن ايتۋدا.

«گولليۆۋد بەلگىسى ورتەنگەن جوق... كوپتەگەن جاڭالىق پاراقشالارى مەن باسقا دا اككاۋنتتار كەرىسىنشە اقپارات بەرىپ، ي-مەن جاسالعان سۋرەتتەردى تاراتۋدا»، — دەلىنگەن جازبالاردىڭ بىرىندە.  

Instagram, TikTok قوسىمشا قولدانۋشىلارى گولليۆۋد بەلىگىسىنىڭ جانىندا نە اينالاسىندا سۋرەت پەن ۆيدەوجاريالاپ، گولليۆۋد بەلگىسىنىڭ ورتەنگەنىنە ەشقانداي دالەل جوق ەكەنىن كورسەتىپ جاتىر.

ودان بولەك، بىرنەشە سايتتاردا قىزىل جالىننىڭ جاساندى ينتەللەكت ارقىلى جاسالعان سۋرەتتەرى جاريالانعان. كوپتەگەن ادامدار شىنايى سۋرەت پەن جاساندى ينتەللەكت جاساعان ماتەريالدى اجىراتا الماۋدا. وسىعان ساي فەيك اقپاراتتار دا جەلىدە قاپتاپ ءجۇر.

تاريحتاعى جويقىن ءورت

لوس-اندجەلەستەگى ءورت ءالى سوندىرىلمەگەن. شەتەلدىك باق-تا قىزىل جالىن قايتا ءورشىپ جاتقانى تۋرالى اقپارات تاراۋدا. ايماقتا ونداعان مىڭ تۇرعىن ءۇشىن ەۆاكۋاتسيا تۋرالى مىندەتتى بۇيرىقتار ەنگىزىلگەن. وكرۋگتىڭ ءورت ءسوندىرۋ قىزمەتىنىڭ باسشىسى ورتكە قارسى كۇرەس رەسۋرستارى ءبىر-ەكى ءىرى ورتكە ارنالعانىن، بىراق ءبىر مەزگىلدە ءتورت ءورتتىڭ باستالۋىنا دايىن بولماعانىن مويىندادى. جاعدايدى كۇشەيتىپ تۇرعان كۇشتى جەلدەر اۆياتسيانىڭ جۇمىسىن ۋاقىتشا توقتاتۋعا ءماجبۇر ەتسە، پاليسەيدس اۋدانىنداعى ءورت گيدرانتتارى ىستەن شىققان.  

«لوس-اندجەلەستەن شامامەن 72 شاقىرىم سولتۇستىكتە ورنالاسقان حيۋزدەگى ءورت 10 000 اكردان (4000 گەكتار) استام اۋماقتى قامتىپ، ايماقتاعى ونداعان مىڭ ادامدى ەۆاكۋاتسيالاۋعا ءماجبۇر ەتتى. بۇل ايماق تاريحىنداعى ەڭ جويقىن ورتتەرمەن كۇرەسىپ جاتقان ەدى. سولتۇستىك جاعىندا تاعى ەكى ءىرى ءورت بولىپ، كەمىندە 28 ادامنىڭ ءومىرىن قيىپ، لوس-اندجەلەس وكرۋگىنىڭ بىرنەشە اۋدانىن جويىپ جىبەرگەن»، – دەپ جازادى BBC.  

31 000-نان استام ادام ەۆاكۋاتسيالاندى. سەبەبى ءورت كاستايك كولىنىڭ توڭىرەگىندەگى تاۋلى جەرلەردە ۇلكەن جالىن مەن قويۋ ءتۇتىن تۋدىردى. بۇل ايماق بىرنەشە تۇرعىن ءۇي اۋداندارى مەن مەكتەپتەرمەن شەكتەسەدى. لوس-اندجەلەس وكرۋگىنىڭ شەريفى روبەرت لۋنانىڭ ايتۋىنشا، جەرگىلىكتى تۇرمەدەن شامامەن 500 تۇتقىن ەۆاكۋاتسيالانۋدا.  

جەرگىلىكتى باق-تىڭ حابارلاۋىنشا، حيۋز ءورتىنىڭ ماڭىنداعى تۇرعىندار ءوز ۇيلەرى مەن باقتارىن سۋ شاشىپ قورعاۋعا تىرىسسا، باسقالارى اسىعىس ەۆاكۋاتسيالانۋدا.  

Orora Technologies كومپانياسىنىڭ جىلۋ بارلاۋ دەرەكتەرى مەن بولجامدارىنا سايكەس، ءورت شىققان جەرىنەن وڭتۇستىككە جانە باتىسقا قاراي تارالۋى مۇمكىن.  

سىمبات ناۋحان

«ادىرنا» ۇلتتىق پورتالى

Реклама
  • ИП Попов А.П.
  • ИНН: 602715631406
Мы с мужем обрели вторую молодость! Вот как ему вернули потенцию…
Реклама
  • ИП Попов А.П.
  • ИНН: 602715631406
Пьяные что ли? Пугачева с мужем шокировали своим развратом
Реклама
  • ИП Попов А.П.
  • ИНН: 602715631406
Каждый диабетик в г.Колумбус с 24 февраля имеет право получить...
پىكىرلەر