بىلتىر وندىرىستەگى جازاتايىم وقيعالاردان 200-دەن استام جۇمىسشى قازا تاپتى. بۇل تۋرالى بۇگىن، 27 قاڭتاردا ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك ەڭبەك ينسپەكتسياسى كوميتەتى ايتتى، دەپ حابارلايدى «ادىرنا» ءتىلشىسى.
مينيسترلىكتىڭ مالىمەتىنشە، وتكەن جىلدىڭ قورىتىندىسى بويىنشا وندىرىستىك جاراقاتتانۋ 2023 جىلمەن سالىستىرعاندا 4,5%-عا تومەندەگەن.
«2024 جىلدىڭ قورىتىندىسى بويىنشا وندىرىستىك جاراقاتتانۋ كوەففيتسيەنتى (1000 جۇمىسكەرگە شاققانداعى جازاتايىم وقيعالاردىڭ جيىلىگى) 0,20 قۇرادى. 1408 جۇمىسكەر زارداپ شەگىپ، ونىڭ 202-ءى قازا بولدى. رەسپۋبليكانىڭ ونىدىرىستىك ايماقتارىندا جاراقات الۋدىڭ ەڭ جوعارى دەڭگەيى ساقتالۋدا. ماسەلەن، قاراعاندى وبلىسىندا – 159 ادام، شقو-دا – 124 ادام، پاۆلودار وبلىسىندا – 112 ادام، اباي وبلىسىندا – 101 ادام، قوستاناي وبلىسىندا – 91 ادام، زارداپ شەككەن. سونداي-اق، الماتى قالاسىندا 116 ادام زارداپ شەكتى»،—دەلىنگەن حابارلامادا.
