«رەكوردتار كارۋسەلى»: اقمولا وبلىسى ەلورداعا ءسۇت ونىمدەرىن جەتكىزۋدى 50 پايىزعا دەيىن ارتتىرۋدى كوزدەيدى

993
Adyrna.kz Telegram

اقمولا وبلىسى ءسۇتتى مال شارۋاشىلىعىندا يننوۆاتسيالارعا باسىمدىق بەرىپ، الدىڭعى قاتارلى تەحنولوگيالاردى ەنگىزۋ ارقىلى بيىك ماقساتتارعا قول جەتكىزۋدى جوسپارلاپ وتىر. تسەلينوگراد اۋدانىنىڭ «رودينا» اگروفيرماسىندا قازاقستاندا عانا ەمەس، بۇكىل ورتالىق ازيادا تەڭدەسى جوق ساۋ تسەحىنىڭ اشىلۋ ءراسىمى ءوتتى. ءىس-شاراعا اۋىل شارۋاشىلىعى ۆيتسە-ءمينيسترى امانعالي بەردالين جانە وبلىس اكىمىنىڭ ورىنباسارى مۇرات بالپان قاتىستى.

DeLaval شۆەد برەندى ۇسىنعان روبوتتاندىرىلعان ساۋ كارۋسەلى جۇيەسى 5 ساعات ىشىندە 2000 سيىردى ساۋعا قابىلەتتى جانە ءبىر ۋاقىتتا 80 سيىردى قابىلداي الادى. بۇل جۇيەنى ءبىر اۋىسىمدا بار بولعانى 12 قىزمەتكەر باسقارادى، وسىلايشا وپەراتوردىڭ ەڭبەگى بارىنشا ازايادى. سونداي اق كۇن سايىن ءار قارا مال وتىز ليتردەن استام ءسۇت بەرسە، بۇگىندە بۇل كورسەتكىشتىڭ  رەكوردىن 86  ليتر ءسۇت بەرگەن سيىر ورناتتى.

شارۋاشىلىقتا جانۋارلاردىڭ جايلىلىعىنا ەرەكشە كوڭىل بولىنگەن. اتاپ ايتار بولسا،  تۇياقتار مەن جەلىنى وڭدەلەدى، ارنايى داتچيكتەر سيىرلاردىڭ تاماقتانۋ راتسيونىن قاداعالاپ، ولاردىڭ دەنساۋلىعىن باقىلاۋعا مۇمكىندىك بەرەدى.

ايتا كەتۋ كەرەك، كەشەننىڭ ىسكە قوسىلۋى – مەملەكەت باسشىسىنىڭ وڭدەلگەن اۋىل شارۋاشىلىعى ونىمدەرىنىڭ ۇلەسىن 70%-عا دەيىن ارتتىرۋ جونىندەگى تاپسىرماسىن جۇزەگە اسىرۋداعى ماڭىزدى قادام.

«ءبىزدىڭ الدىمىزدا ءسۇت ونىمدەرىن ەلورداعا جەتكىزۋدى 50%-عا دەيىن ارتتىرۋ مىندەتى تۇر. بۇل ءۇشىن وڭىردە جاڭا وندىرىستەر قۇرىلىپ، قولدانىستاعىلارى كەڭەيتىلۋدە. ينۆەستيتسيالىق جوبالاردى جەڭىلدەتىلگەن نەسيەلەۋ باعدارلاماسى ءتيىمدى قولداۋ قۇرالىنا اينالدى»، – دەپ اتاپ ءوتتى مۇرات بالپان.

اتالعان شارالار اقمولا وبلىسىنا تاۋارلىق ءسۇت ءوندىرىسىن 40 مىڭ تونناعا نەمەسە 1,5 ەسەگە، 90 مىڭ توننادان 130 مىڭ تونناعا دەيىن ۇلعايتۋعا مۇمكىندىك بەرەدى. ءوز كەزەگىندە، بۇل ءوسىم وڭىرگە ەلوردا تۇرعىندارىن 50%-عا ءسۇت ونىمدەرىمەن قامتاماسىز ەتۋگە جول اشادى.

وتكەن جىلى وڭىردە جالپى سانى 4,9 مىڭ باس مالعا ارنالعان بەس ءىرى ءسۇت-تاۋارلى فەرما قۇرىلدى. بيىل وڭىردە تاعى 1,2 مىڭ باسقا ارنالعان 2 فەرما ىسكە قوسۋ جوسپارلانۋدا. بۇل – اقمولا وبلىسىنىڭ تاۋارلى ءسۇت ءوندىرىسىن 1,5 ەسەگە ارتتىرىپ، استانالىقتاردى ساپالى ءارى ەكولوگيالىق تازا ونىمدەرمەن قامتاماسىز ەتۋگە باعىتتالعان العاشقى قادامدار.

 

پىكىرلەر