گازاداعى اتىستى توقتاتۋ باستاپقى بەلگىلەنگەن مەرزىمنەن بىرنەشە ساعاتقا كەش كۇشىنە ەندى، دەپ حابارلايدى "ادىرنا" ۇلتتىق پورتالى.
يزرايل تاڭەرتەڭ حاماس توبىنان جەكسەنبى كۇنى بوساتىلۋى ءتيىس ءۇش تۇتقىن ايەلدىڭ ەسىمدەرىن الماعاندىقتان، اتىستى توقتاتپايتىنىن مالىمدەدى.
استانا ۋاقىتى بويىنشا شامامەن ساعات 14:00-دە يزرايل تۇتقىندار ءتىزىمىن العانىن جانە اتىستى رەسمي تۇردە توقتاتاتىنىن راستادى.
وسىلايشا، گازادا قازىرگى سوعىس باستالعالى بەرى ەكىنشى رەت اتىستى توقتاتۋ رەجيمى كۇشىنە ەندى.
تاراپتار اراسىنداعى كەلىسىمدەرگە سايكەس، 42 كۇنگە سوزىلاتىن بۇل ۋاقىتشا ءبىتىم كەزىندە حاماس-تىڭ تۇتقىندا ۇستاپ وتىرعان 98 ادامنىڭ ىشىنەن 33 ادام بوساتىلۋى ءتيىس. ءوز كەزەگىندە يزرايل 700-دەن استام پالەستيندىكتى تۇرمەدەن بوساتىپ، پالەستيندىكتەرگە گۋمانيتارلىق كومەك كورسەتىلەتىنىنە ۋادە ەتتى.
