ەنەرگەتيكا مينيسترلىگى 1 اقپاننان باستاپ سۇيىتىلعان مۇناي گازىنىڭ (اۆتوكولىكتەرگە وتىن رەتىندە پايدالانىلاتىن) شەكتى كوتەرمە باعاسىنىڭ قىمباتتايتىنىن مالىمدەدى. جاڭا بۇيرىققا سايكەس، گازدىڭ تونناسى 45 158 تەڭگەدەن 51 932 تەڭگەگە دەيىن كوتەرىلەدى، دەپ حابارلايدى "ادىرنا" ۇلتتىق پورتالى.
باعانىڭ ءوسۋى وندىرۋشىلەردىڭ شىعىندارىن وتەۋ ماقساتىندا قابىلدانعان. مينيسترلىكتىڭ مالىمەتىنشە، سۇيىتىلعان گازدىڭ وزىندىك قۇنى تونناسىنا 65 مىڭنان 75 مىڭ تەڭگەگە دەيىن جەتەدى، ال بۇل ءوندىرۋشى كاسىپورىنداردىڭ قارجىلىق قيىندىقتارعا تاپ بولۋىنا اكەلىپ وتىر.
سونداي-اق، سۇيىتىلعان گازدى تۇتىنۋ كولەمى ايتارلىقتاي وسكەن. 2022 جىلى – 1,8 ملن توننا بولسا، 2024 جىلى بولجام – 2,4 ملن توننا.
بۇل وزگەرىس بولشەك ساۋداداعى باعانىڭ دا وسۋىنە اسەر ەتەدى. وڭىرلەرگە بايلانىستى باعا ليترىنە 6-دان 21 تەڭگەگە دەيىن كوتەرىلەدى. ناقتىراق، استانا مەن الماتىدا 84-89 تەڭگەدەن - 102 تەڭگەگە دەيىن، شىمكەنتتە 70 تەڭگەدەن 90 تەڭگەگە دەيىن وسەدى.
مينيسترلىك مالىمدەگەندەي، قازىرگى جاعدايدا ءوندىرۋشى كاسىپورىندار ءوز وندىرىستەرىن جاڭعىرتۋ مەن جوسپارلى جوندەۋ جۇمىستارىنا قاجەتتى قاراجاتتى تابا الماي وتىر. باعانى كوتەرۋ – وسى ماسەلەلەردى شەشۋ جانە سالانى تۇراقتاندىرۋ ءۇشىن قاجەت قادام دەپ باعالانىپ وتىر.
سۇيىتىلعان گاز باعاسىنىڭ ءوسۋى اۆتوكولىك يەلەرىنىڭ شىعىنىن ارتتىرىپ، جانارماي قۇيۋ بەكەتتەرىندەگى باعانىڭ دا قىمباتتاۋىنا اكەلۋى مۇمكىن.
ۇقساس جاڭالىقتار
