مەملەكەت باسشىسىنىڭ «Ana tili» گازەتىنە بەرگەن سۇحباتى اياسىندا
«ادام- تابيعات پەرزەنتى» دەپ دانىشپان اباي ايتقانداي بارشا حالىق تابيعات اياسىندا ءومىر سۇرەدى. اۋا جۇتادى، سۋ ىشەدى، كۇن كوزىنەن قۋات الادى. سوعان قاراماستان، سوڭعى جىلدار اۋماعىنداعى كۇردەلى ەكولوگيالىق پروبلەمالار ادامداردىڭ «تابيعاتتى ايالايىق، كوزدىڭ قاراشىعىنداي ساقتايىق!» دەگەن ۇعىمداعى ىزگى كوزقاراستان الشاقتاپ، كۇندەلىكتى قاۋىرت تىرشىلىك اياسىندا كەرىسىنشە، تابيعاتتان ىرگەسىن اۋلاق سالىپ، ءتىپتى، كەيبىر تۇستاردا قارسى ارەكەتكە جول بەرەتىن جاعدايلار قالىپتى قۇبىلىسقا اينالىپ بارادى. سونىڭ سالدارىنان، اياۋلى ارمان قالا الماتىداعى اۋانىڭ لاستانۋىنان باستاپ، ورىن العان قانشاما كەرى پروتسەسستەردىڭ بەتىن قايتارىپ، ادامزات پەن تابيعات اراسىنداعى تەپە-تەڭدىكتى ساقتاۋ كەزەك كۇتتىرمەيتىن كەلەلى ماسەلەگە اينالعانى – اششى شىندىق. سوندىقتان دا مەملەكەت باسشىسى قاسىمجومارت توقاەۆتىڭ «تازا قازاقستان» اكتسياسى – قازاقستان حالقىن ىزگىلىككە باعىتتاپ، جاقسىلىققا جول اشۋدىڭ بىردەن-ءبىر شارتى.
«تازا قازاقستان» اكتسياسى قوعامعا ەكولوگيالىق مادەنيەتتىڭ جاڭا تالاپتارىن ەنگىزۋ يدەياسىنان باستاۋ الادى. قازاقستان ازاماتتارى مۇنىڭ كەزەكتى ءبىر ناۋقان ەمەس، وزىق ويلى قوعام قالىپتاستىرۋ جولىنداعى يدەولوگيالىق پلاتفورما ەكەنىن ءتۇسىندى. ءبىز، تابيعاتتىڭ بايلىعىنا جانە كۇندەلىكتى تۇرمىس-تىرشىلىگىمىزگە نەمقۇرايلى قارايتىن جاعىمسىز ادەتتەن ءبىرجولا ارىلۋىمىز قاجەت. تازالىقتى ساقتاۋ جانە تابيعاتتى ايالاۋ ۇلتتىق بولمىسىمىزدىڭ اجىراماس بولىگىنە بولۋعا ءتيىس. بۇل اكتسياعا 3,8 ميلليونعا جۋىق ادام قاتىستى. 1,5 ميلليون توننادان استام قوقىس جينالىپ، 3,2 ميلليوننان استام كوشەت ەگىلدى. وسىنىڭ ءوزى ازاماتتارىمىزدىڭ قازاقستاندى وزگەرتۋگە ناقتى ىسپەن ۇلەس قوسۋعا دايىن ەكەنىن كورسەتتى. سوندىقتان، ءتۇپتىڭ تۇبىندە، «تازا قازاقستان» يدەياسى ۇلتتىق يدەولوگيامىزدىڭ اسا ماڭىزدى بولىگىنە اينالۋعا ءتيىس» دەگەن رەسپۋبليكا پرەزيدەنتىنىڭ ۇستانىمى - ۇلت كەلەشەگى ءۇشىن ۇمتىلىستىڭ وتكىر وزەگى.
«تازا قازاقستان» يدەياسى – «مالىم – جانىمنىڭ، جانىم – ارىمنىڭ ساداعاسى» دەگەن نامىسشىل قازاقتىڭ ىشكى ىزگىلىگىن وياتاتىن، ۇلكەنگە دە، كىشىگە دە وي سالاتىن، ءسويتىپ، بۇگىنگى ءوزىمىز ءومىر ءسۇرىپ وتىرعان قورشاعان ورتانى بەرەكەسىن قاشىرماي، كەرىسىنشە، جاپىراعىن جايقالتىپ، تامىرىن نارلەندىرىپ، كەلەشەك ۇرپاقتىڭ يگىلىگىنە امانات ەتۋ جولىنداعى كرەاتيۆتى قۇبىلىس. ءبىز مەكتەپتە وقىپ جۇرگەندە «جاس ناتۋراليست» دەگەن بيلەتىمىز بولاتىن. كىمدە-كىم جاپىراقتى جۇلسا، گۇلدى ۇزسە بىردەن بيلەتىمىزدى كورسەتىپ، سول ءۇشىن ەسكەرتۋ جاساپ، كەلەسى جولى قاتاڭ شارا قولداناتىنىن ايتۋشى ەدىك. بۇل اكتسيا – سول جاقسى ءداستۇردىڭ جالعاسى. دەمەك، تابيعاتتىڭ قادىرىن ءبىلىپ، قۇنىن تۇسىنگەن ەلىمىزدىڭ ءاربىر ازاماتى، اينالاسىنداعى ادامداردىڭ جاندۇنيەسىنە جىلۋ سىيلاپ، ءوزىن قورشاعان ورتادان رۋحاني ءنار الۋعا ءاردايىم اشىق بولادى. سوندىقتان، «تازا قازاقستان» باستاماسى كۇندەلىكتى ءومىردىڭ قالىپتى ىرعاعىنا ۇلاسۋى ءتيىس.
ابدىجادىلقىزى جيدەگۇل
ال-فارابي اتىنداعى قازۇۋ دوتسەنتى
