جامبىل وبلىسىندا قاردىڭ قالىڭ جاۋى مەن بوران سالدارىنان جولداردىڭ جابىلۋىنا بايلانىستى مىڭنان استام اۆتوكولىك جولدا قالىپ قويدى، دەپ حابارلايدى "ادىرنا" ۇلتتىق پورتالى.
7 قاڭتار كۇنى ايماقتا اۋا رايى كۇرت ناشارلاپ، قاتتى قار جاۋىپ، بوران سوعىپ، جەلدىڭ جىلدامدىعى سەكۋندىنا 20 مەترگە دەيىن جەتكەن.
الماتى – تاشكەنت – تەرمەز اۆتوجولىنىڭ 238-دەن 159-شى شاقىرىمى ارالىعىندا (قاينار اۋىلىنان وتار ەلدى مەكەنىنە دەيىن) بارلىق كولىك تۇرلەرى ءۇشىن قوزعالىس شەكتەلگەن. وبلىستىق پوليتسيا دەپارتامەنتىنىڭ مالىمەتىنشە، قوزعالىس ەسكى قورداي اسۋى ارقىلى بالاما باعىتتا جۇزەگە اسىرىلادى. سونداي-اق تۇركىستان وبلىسىنا قاراي (جۋالى اۋدانى اۋماعىندا) جول جابىلدى.
"قازىرگى ۋاقىتتا جول قوزعالىسى شەكتەلگەن ورىنداردا 1050 اۆتوكولىك جينالدى، ونىڭ 580-ءى جۇك كولىكتەرى", - دەلىنگەن ۆەدومستۆو حابارلاماسىندا.
پوليتسيانىڭ 100-دەن استام قىزمەتكەرى 45 اۆتوپاترۋل جۇرگىزۋشىلەرگە ءتۇرلى كومەكتەر كورسەتۋدە. جولدى تازارتۋ ءۇشىن شامامەن 20 ارنايى تەحنيكا جۇمىلدىرىلعان.
"جۋالى اۋدانى شاحان اسۋىندا قالعان 14 تۇرعىن ۋچاسكەلىك ينسپەكتورلار ارقىلى كۇلتوعان اۋىلىنا جەتكىزىلىپ، تۋىستارىنىڭ ۇيلەرىنە ورنالاستىرىلدى. سونىمەن قاتار، پاترۋلدىك پوليتسيا قار قۇرساۋىنان 10-نان استام اۆتوكولىكتى شىعارىپ الدى", - دەپ مالىمدەدى پوليتسيا دەپارتامەنتىنىڭ ءباسپاسوز قىزمەتى.
پاترۋلدىك پوليتسيا قىزمەتكەرلەرى جۇرگىزۋشىلەر مەن جولاۋشىلاردى جىلىتۋ ورىندارىنا ورنالاستىرۋدا، وندا ولار دەمالىپ، جاعدايدىڭ جاقسارۋىن كۇتە الادى.
جامبىل وبلىستىق پوليتسيا دەپارتامەنتى جۇرگىزۋشىلەردى قولايسىز اۋا رايىندا جولعا شىقپاۋعا، سونداي-اق كولىكتەرىنىڭ تەحنيكالىق دايىندىعىن تەكسەرۋگە شاقىردى.
