تيبەت اۆتونوميالىق ايماعىندا بولعان جەر سىلكىنىسىنەن قازا تاپقاندار سانى 95 ادامعا جەتتى. بۇل تۋرالى قىتايدىڭ «سينحۋا» اگەنتتىگى جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، اپات سالدارىنان قازىرگى ۋاقىتتا 130 ادام جاراقات العان.
«جەر سىلكىنىسى بۇگىن تاڭعى 9:05-تە (پەكين ۋاقىتى) سيگادزە قالاسىنىڭ تينگري ۋەزىندەگى تسوگو اۋىلىندا تىركەلگەن. ءزىلزالا ماگنيتۋداسى 6,8 باللدى قۇراعان. ەپيتسەنتردەن 20 شاقىرىم راديۋستا 6 900 ادام تۇراتىن 27 اۋىل ورنالاسقان. رەسمي دەرەكتەر بويىنشا، قازىرگى ۋاقىتتا 130 ادام جاراقات العان. قۇتقارۋ جۇمىستارىن جۇرگىزۋ ءۇشىن اپات ايماعىنا 3 400-دەن استام قۇتقارۋشى مەن 340 مەديتسينالىق قىزمەتكەر جىبەرىلگەن»، — دەپ جازىلعان ماتەريالدا.
ايتا كەتەيىك، بۇگىن پرەزيدەنت قاسىم-جومارت توقاەۆ قىتاي حالىق رەسپۋبليكاسىنىڭ توراعاسى سي تسزينپينگە كوڭىل ايتۋ جەدەلحاتىن جولداعان بولاتىن. مەملەكەت باسشىسى ءوزىنىڭ جانە قازاقستان حالقىنىڭ اتىنان قازا بولعانداردىڭ وتباسىلارىنا جانە قىتاي حالقىنا كوڭىل ايتىپ، زارداپ شەككەندەرگە تەز ساۋىعىپ كەتۋىن تىلەدى.
