اقتاۋدا Rixos قوناقۇيىنىڭ جانىندا قۇستار قىرىلىپ جاتقانى تۋرالى اقپارات تارادى. بۇل تۋرالى Lada.kz سايتى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ورمان شارۋاشىلىعى جانە جانۋارلار دۇنيەسى كوميتەتىنىڭ وبلىستىق اۋماقتىق ينسپەكتسياسى Rixos قوناقۇيى ماڭىنان ولگەن قۇستاردىڭ تابىلۋىنا قاتىستى تۇسىنىكتەمە بەردى.
ينسپەكتورلار قوناقۇي ماڭىنداعى جاعالاۋدى ارالاعاندا ءبىر اققۋدىڭ، تاعى التى ۇيرەكتىڭ ولەكسەسىن تاپتى.
ۆەدومستۆو بۇل وقيعا تۋرالى قالا بيلىگى مەن Rixos اكىمشىلىگىنە حابارلانعانىن ءمالىم ەتتى.
“قاراكول كولىندە قازىر 10-نان استام اققۋ مەن باسقا دا قۇستار مەكەندەيدى. كاسپي تەڭىزىنىڭ جاعالاۋىندا بىرنەشە قۇستىڭ قىرىلۋى قۇستاردىڭ السىرەۋىنەن تابيعي تۇردە بولدى”، دەيدى ورمان شارۋاشىلىعى جانە جانۋارلار دۇنيەسى كوميتەتىنىڭ وبلىستىق اۋماقتىق ينسپەكتسياسى.
جاپپاي قىرىلۋ بولعان جوق، دەپ سەندىردى ينسپەكتسيا. دەگەنمەن، جەلتوقسان ايىنىڭ سوڭىندا قاراكول كولىندە ميكروبيولوگيا جانە ۆيرۋسولوگيا ورتالىعىنىڭ ماماندارى زەرتتەۋ ءۇشىن ولگەن اققۋلار مەن ۇيرەكتەردەن سىناما العان. ناتيجەسى 10 قاڭتارعا دەيىن دايىن بولادى.
ۆەدومستۆو قۇستاردىڭ قۇس تۇماۋىنان قىرىلۋى مۇمكىن ەكەنىنە دە بولجام جاساپ وتىر.
بۇعان دەيىن اققۋلاردىڭ جاپپاي قىرىلۋىنا بايلانىستى ماڭعىستاۋدا Rixos Aktau قوناقۇيىنە قاتىستى ءىس قوزعالعان بولاتىن.
