قوستاناي وبلىسىنىڭ اكىمى قۇمار اقساقالوۆ قوستاناي قالاسىنداعى اباي قۇنانبايۇلى اتىنداعى ارالاس مەكتەبىنىڭ قازاق سىنىبىنىڭ جابىلۋىنا بايلانىستى سۇراققا جاۋاپ بەردى، دەپ حابارلايدى «ادىرنا» ۇلتتىق پورتالى.
ورتالىق كوممۋنيكاتسيالار ورتالىعىندا اكىمگە «قوستانايداعى يۋبەلەينىي شاعىن اۋدانىنداعى اباي قۇنانبايۇلى اتىنداعى ارالاس مەكتەپتىڭ باسشىلىعى قازاق سىنىبىن جاۋىپ، ورىس مەكتەبى ەتكىسى كەلىپ وتىر ەكەن. قازاقتار كوپ تۇراتىن اۋدانداعى مەكتەپ تازا قازاق مەكتەبى بولۋدىڭ ورنىنا ورىس تىلىندە ءبىلىم بەرۋگە كوشۋىنە نە سەبەپ بولىپ وتىر؟ بۇدان ءسىز حاباردارسىز با؟» دەگەن سۇراق قويىلدى.
قۇمار ىرگەبايۇلى اتالعان اقپاراتتى ەستىمەگەنىن ەسكەرتتى.
«مەنىڭ ويىمشا، ول دۇرىس ەمەس. قازىر قازاق مەكتەبىندە وقيتىن بالالاردىڭ سانى كوبەيىپ جاتىر. ونداي تەندەنتسيا بار. ونى جاسىراتىن ەشتەڭەسى جوق. سالىنىپ جاتقان مەكتەپتەردىڭ ءبارى قازاق مەكتەپتەر. سوندىقتان بۇل تەندەنتسيا جالعاسىن تابادى. ال مەن ايتىلعان فاكتىلەردى مەن تەكسەرىپ الايىن»، – دەدى ول.
سونداي-اق جۋرناليستەر «قوستاناي وبلىسىنىڭ ءبىلىم باسقارماسىنىڭ باسشىسى ايمان يبراەۆا مەملەكەتتىك ءتىلدى بىلمەيتىن كورىنەدى. مەملەكەتتىك ءتىلدى بىلمەيتىن مەملەكەتتىك قىزمەتشى قازتەستەن قالاي ءوتۋى مۇمكىن؟» دەپ اكىمنەن سۇرادى.
وبلىس اكىمى ايمان ەلەمەنقىزىنىڭ مەملەكەتتىك ءتىلدى جەتىك بىلمەيتىنىن مويىندادى.
«ءيا، ونداي فاكتىلەر بار. شامالى دەپ ايتۋعا بولادى. مۇلدەم بىلمەيدى دەپ ايتا المايمىن، بىراق مەملەكەتتىك ءتىلدى شامالى بىلەدى. وعان تالاپ قويىلىپ جاتىر. تەك قانا ايمان ەلەمانقىزىنا عانا ەمەس، باسقا دا ازاماتتار ءوزىمىزدىڭ انا تىلىمىزدە سويلەسىپ، اينالىسۋ كەرەك»، – دەدى اكىم.
