بۇگىن ماجىلىستە وتكەن ۇكىمەت ساعاتىندا دەپۋتات ەدىل جاڭبىرشين Air Astana اۋەكومپانياسىنىڭ جۇمىسىن سىنعا الىپ، باس اتقارۋشى ديرەكتور پيتەر فوستەرگە شۇيلىكتى، دەپ حابارلايدى «ادىرنا» ءتىلشىسى.
«Air Astana اسپاننىڭ «قۇدايى» بولىپ العان. بارلىق بيلەتتىڭ باعاسى جاقىنداعاندا كوتەرىلەدى. اراقاشىقتىق دەگەن بوس اڭگىمە. ول جاقىنداعاندا، كەرىسىنشە، ءتۇسۋى كەرەك. سەبەبى بيلەتتى تەز وتكىزۋ قاجەت. ال كومپانيا كەرىسىنشە جۇمىس ىستەيدى. Air Astana ماسەلەسىن ماي شاممەن قاراۋ كەرەك. فوستەر مىرزا، شاڭىراققا قاراڭىز. ءسىز وسى مەملەكەتتىڭ زاڭىنا باعىنۋىڭىز كەرەك. ءبىز دەپۋتات سامات مۇساباەۆ ەكەۋمىز ءبىر ساعات كەشىككەنگە ايىپپۇل سالاتىن نورما ەنگىزدىك. ەندى قىزىقتى قاراڭىزدار، مەن ۇشار الدىندا 2 تامىز كۇنى ۇشاق 12 ساعاتقا كەشىكتى. ءالى كۇنگە دەيىن اقشاسىن الا الماي ءجۇرمىن. نەگە؟ ولار قۇيتىرقى سحەما جاساپ قويعان»،—دەدى جاڭبىرشين.
دەپۋتات ءتىل ماسەلەسىن دە كوتەردى.
«بۇكىل مۋلتيمەديا باسقا تىلدە. مەملەكەتتىك تىلدە كونتەنت وتە از. ونى بىرنەشە رەت ايتتىق. ول دا ۇلكەن ماسەلە. ءوزىمىزدىڭ كومپانيا دەيمىز. بىراق نەگە ول مەملەكەتتىك تىلگە باسىمدىق بەرمەيدى؟»– دەپ ساۋال تاستادى ول.
اۋە كومپانياسىن سىناپ سويلەگەن كەزىندە فوستەردىڭ كۇلۋى دەپۋتاتتىڭ شامىنا ءتيدى.
«كۇلەتىن ەشتەڭە ەمەس، كۇلمەڭىز. ءسىز وسى جەردە وتىرىپ الىپ. ءبىزدى مەنسىنبەي وتىرسىز. ءبىز سىزگە ەشتەڭەنى تۇسىنبەيتىن افريكاداعى ابوريگەن ەمەسپىز. بۇل — پارلامەنت، وسىندا حالىقتىڭ وكىلدەرى وتىر»،—دەدى جاڭبىرشين.
