گرۋزيا پرەمەر-ءمينيسترى يراكلي كوباحيدزە پرەزيدەنت سالومە زۋرابيشۆيلي جاڭا پارلامەنتتىك سايلاۋ وتكىزۋ تۋرالى شەشىم قابىلداپ، ءوز قىزمەتىنەن كەتپەسە، وعان قىلمىستىق جاۋاپكەرشىلىككە تارتىلۋ قاۋپى ءتونىپ تۇرعانىن مالىمدەدى، دەپ حابارلايدى "ادىرنا" ۇلتتىق پورتالى.
بريفينگتە سويلەگەن سوزىندە پرەمەر-مينيستر ەل كونستيتۋتسياسىنا سايكەس ءزۋرابيشۆيليدىڭ پرەزيدەنتتىك وكىلەتتىگىنىڭ مەرزىمى 2024 جىلعى 29 جەلتوقساندا اياقتالاتىنىن ەسكە سالدى.
"كەيبىر ەۋروپالىق ساياساتكەرلەر مەن لاۋازىمدى تۇلعالار 29 جەلتوقسانعا دەيىن كوپ نارسە وزگەرۋى مۇمكىن دەيدى. بىراق مەن سىزدەرگە ايتايىن، ەشقانداي ۇلكەن وزگەرىس بولمايدى. راديكالدى وپپوزيتسيا گرۋزيادا جەڭىسكە جەتە المايدى، ال 29 جەلتوقساندا زۋرابيشۆيلي ءوز قىزمەتىن بوساتۋعا ءماجبۇر بولادى،" – دەدى كوباحيدزە.
سونداي-اق، ول قازىرگى پرەزيدەنتتىڭ قىلمىستىق كودەكس نورمالارىن بۇزباۋعا جەتكىلىكتى نەگىزدەرى بار ەكەنىن اتاپ ءوتتى.
2024 جىلعى 14 جەلتوقساندا گرۋزيادا العاش رەت تىكەلەي حالىقتىق داۋىس بەرۋ ارقىلى ەمەس، بيلەۋشى پارتيا ۇسىنعان جالعىز كانديدات، ەكس-فۋتبولشى ميحايل كاۆەلاشۆيلي پرەزيدەنت بولىپ سايلاندى.
سالومە زۋرابيشۆيلي بۇل سايلاۋدى زاڭسىز دەپ سانايدى جانە ونىڭ ناتيجەلەرىن مويىندامايدى. ول ءادىل پارلامەنتتىك سايلاۋ وتكىزىلگەنشە ءوز قىزمەتىندە قالۋعا ۋادە بەردى.
