استانا قالاسىنداعى “Sun Study” وقۋ ورتالىعىندا بەلگىلى اقىن، جازۋشى، قوعام قايراتكەرى مۇحتار شاحانوۆپەن كەزدەسۋ ءوتتى. ءىس-شارا تاۋەلسىزدىك مەرەكەسى اياسىندا بۇلدىرشىندەرگە شىعارماشىلىعىن تانىتۋ جانە ءومىر جولىن ونەگە ەتۋ ماقساتىندا ۇيىمداستىرىلىپ، قالا تۇرعىندارىنىڭ باسىن قوستى.
كەش مۇحتار شاحانوۆتى سالتاناتتى تۇردە كۇتىپ الۋمەن باستالدى. قوناقتار جايعاسقان سوڭ تاۋەلسىزدىك كۇنىنە وراي بارلىعى ورنىنان تۇرىپ، جۇرەكتەرىن ۇستاپ ءانۇران ورىندادى. كەشتىڭ شىمىلدىعىن جۋرناليست، تەرمەشى امانگەلدى سەيتحان دومبىرامەن توگىلتىپ تۇرىپ ارناۋ ايتتى. ارناۋدا شاحانوۆتىڭ شىعارماشىلىق جەتىستىكتەرى، ەرەن ەڭبەگى، ەرلىكتەرى تولىق قامتىلىپ، پورترەتتىك بەينەسى ايقىندالعانداي اسەر قالدىردى. اقىننىڭ ادەبيەتتەگى ورنى مەن تاۋەلسىزدىك جولىنداعى ەڭبەگىنە قۇرمەتتىڭ ءبىر كورىنىسى رەتىندە شىعارمالارىنان ۇزىندىلەر وقىلدى.
نەبارى 12 جاستاعى جاس اقىن نۇراسىل جاسۇلانۇلى ءوزى جازعان“تاۋەلسىزدىك”، “تۋعان ءتىل”، ء“اليحان بوكەيحانعا ارناۋ” اتتى ولەڭدەرىن وقىپ، كوپشىلىكتى تاڭ قالدىردى. جاس اقىن بالا ۇلى اقىننىڭ ريزاشىلىعىنا بولەندى.
جاس اقىندار قابيدەن قۋانىشبايۇلى مەن سارقىتبەك نۇردىبەك مۇحتار شاحانوۆقا ارناۋ ولەڭدەرىن وقىپ، ەرەكشە اسەر قالدىردى. سونىمەن قاتار، “القا” وقۋ ورتالىعىنىڭ مۇعالىمى ەركەجان قايراتقىزى مەن استانا قالاسى #93 مەكتەپتىڭ وقۋشىسى الپىس ومار مۇحتار شاحانوۆتىڭ “جىگەرلەندىرۋ” جانە تولەگەن ايبەرگەنوۆتىڭ مۇحتار شاحانوۆقا ارناعان “ساعىنىش” ولەڭدەرىن مانەرلەپ وقىدى. ولاردىڭ ورىنداۋىنداعى كوركەم ءسوز ونەرى كەشتىڭ رۋحىن بيىكتەتە ءتۇستى.
ادەبي كەشتە مۋزىكا ونەرى دە نازاردان تىس قالعان جوق. حالىق كومپوزيتورلارى، سال-سەرىلەر ەل مەن جەر ءۇشىن كۇرەستە الدىڭعى شەپتەن تابىلىپ، سول ءۇشىن تالاي قۋعىن كورگەنى، يتجەككەنگە ايدالعانى، اباقتىعا قامالعانى، ءتىپتى اتىلىپ وققا ۇشقانى كوپكە ايان. تاۋەلسىزدىك كۇنىندەي قاستەرلى كۇندە ولاردىڭ ەسىمى اتالىپ، اندەرى شىرقالىپ، قۇرمەت كورسەتىلۋى زاڭدىلىق قوي. بەلگىلى ءانشى جاسۇلان ناۋرىزبايۇلى ۇكىلى ىبىرايدىڭ “گاككۋ” ءانىن شەبەرلىكپەن شىرقاسا، Sun Study وقۋ ورتالىعىنىڭ ۇستازى دامير ەركىنۇلى مۇقاعالي ماقاتاەۆتىڭ سوزىنە جازىلعان تۇرسىنعازى راحيموۆتىڭ “قازاعىم-اي” ءانىن وتە جوعارى دەڭگەيدە اۋەلەتتى.
جانبولات شاكىمنىڭ “اكە ۇكىمى” شىعارماسىنان وقىلعان ءۇزىندى دە كوپشىلىكتىڭ جۇرەگىن تەربەپ، تەرەڭ وي سالدى.
كەش بارىسىندا كەلگەن قوناقتار دا توپ ىشىنەن سۋىرىلىپ شىعىپ، مۇحتار شاحانوۆتىڭ ولەڭدەرىن جارىسا، جاتقا وقىدى. قازاق حالقىنىڭ اتاعا دەگەن قۇرمەتىن وسىنداي ساتتەر تاعى ءبىر ايقىنداپ بەردى.
ءىس-شارا سوڭىندا مۇحتار شاحانوۆقا سىي-سياپات ۇسىنىلىپ، اقىن ءوزىنىڭ اق باتاسىن بەردى.
Sun Study وقۋ ورتالىعىنىڭ گۇلفايرۋز مىقتىبەكوۆا باستاعان ۇستازدارى مەن وقۋشىلارى مۇحتار شاحانوۆتىڭ سوزىنە جازىلعان اندەرىن اۋەلەتە شىرقاپ، ءىس-شارانى تۇيىندەدى.
كەشتىڭ ماڭىزى تەك ادەبيەت پەن ونەردى ناسيحاتتاۋدا ەمەس، ۇلت رۋحانياتىن، تاۋەلسىزدىك جولىنداعى كۇرەستى دارىپتەۋدە. مۇحتار شاحانوۆپەن وسىنداي اسەرلى كەزدەسۋ جاستارعا شابىت سىيلاپ، ەلگە، تىلگە دەگەن سۇيىسپەنشىلىكتى ودان ءارى ارتتىرا ءتۇستى.
