قازاقستان رەسپۋبليكاسىنىڭ 2025–2027 جىلدارعا ارنالعان رەسپۋبليكالىق بيۋدجەتىندە رەسەي فەدەراتسياسىنىڭ «بايقوڭىر» كەشەنىن پايدالانۋىنا ارنالعان جالداۋ اقىسى قاراستىرىلعان، دەپ حابارلايدى "ادىرنا" ۇلتتىق پورتالى كازتاگ اگەنتىگىنە سىلتەپ.
2025 جىلعا ارنالعان بيۋدجەتتە رەسەيدىڭ «بايقوڭىر» كەشەنىن پايدالانعانى ءۇشىن 54,05 ملرد تەڭگە كولەمىندە، ال اسكەري پوليگونداردى پايدالانعانى ءۇشىن 9,41 ملرد تەڭگە كولەمىندە كىرىس ءتۇسىمى كوزدەلگەن.
«بايقوڭىر» كەشەنى بايقوڭىر قالاسى مەن عارىش ايلاعىنان تۇرادى. مۇندا 8 ۇشۋ كەشەنى، 13 ۇشىرۋ قوندىرعىسى، سونداي-اق قۇرلىقارالىق بالليستيكالىق زىمىرانداردى ۇشىرۋعا ارنالعان 8 شاحتالىق قوندىرعى بار.
كەشەن 2050 جىلعا دەيىن رەسەيگە جالعا بەرىلگەن.
قازىرگى ۋاقىتتا قازاقستان مەن رەسەي تاراپتارى «بايقوڭىر» عارىش ايلاعىنداعى №1 جانە №2 الاڭداردا مۋزەي كەشەنىن قۇرۋ ماقساتىندا «گاگارين ستارتى» الاڭىن جالعا بەرۋدەن شىعارىپ، قازاقستان تاراپىنا بەرۋ ماسەلەسىن تالقىلاپ جاتىر. بۇل الاڭدا عارىش ايلاعىندا بار عارىش تەحنيكاسىنىڭ ۇلگىلەرىن ورنالاستىرۋ جوسپارلانۋدا.
