Qazaqstan Respýblıkasynyń 2025–2027 jyldarǵa arnalǵan respýblıkalyq bıýdjetinde Reseı Federaııasynyń «Baıqońyr» keshenin paıdalanýyna arnalǵan jaldaý aqysy qarastyrylǵan, dep habarlaıdy "Adyrna" ulttyq portaly KazTAG agentigine siltep.
2025 jylǵa arnalǵan bıýdjette Reseıdiń «Baıqońyr» keshenin paıdalanǵany úshin 54,05 mlrd teńge kóleminde, al áskerı polıgondardy paıdalanǵany úshin 9,41 mlrd teńge kóleminde kiris túsimi kózdelgen.
«Baıqońyr» kesheni Baıqońyr qalasy men ǵarysh aılaǵynan turady. Munda 8 ushý kesheni, 13 ushyrý qondyrǵysy, sondaı-aq qurlyqaralyq ballıstıkalyq zymyrandardy ushyrýǵa arnalǵan 8 shahtalyq qondyrǵy bar.
Keshen 2050 jylǵa deıin Reseıge jalǵa berilgen.
Qazirgi ýaqytta Qazaqstan men Reseı taraptary «Baıqońyr» ǵarysh aılaǵyndaǵy №1 jáne №2 alańdarda mýzeı keshenin qurý maqsatynda «Gagarın starty» alańyn jalǵa berýden shyǵaryp, Qazaqstan tarapyna berý máselesin talqylap jatyr. Bul alańda ǵarysh aılaǵynda bar ǵarysh tehnıkasynyń úlgilerin ornalastyrý josparlanýda.
