اقش قايتادان باشار اسادتىڭ قايىن اتاسى فاۆاز احراستى سيريانىڭ بۇرىنعى پرەزيدەنتىنە قارجىلىق، ماتەريالدىق نەمەسە تەحنولوگيالىق قولداۋ كورسەتكەنى ءۇشىن سانكتسيالار تىزىمىنە قوستى. بۇل تۋرالى 9 جەلتوقسان كۇنى اقش مەملەكەتتىك دەپارتامەنتىنىڭ رەسمي سايتىندا جاريالاندى، دەپ حابارلسيدى “ادىرنا” ۇلتتىق پورتالى.
AFP اگەنتتىگىنىڭ مالىمەتىنشە، فاۆاز احراستىڭ سيريا جانە ۇلىبريتانيا ازاماتتىعى بار جانە لوندوندا كارديولوگ بولىپ جۇمىس ىستەگەن. بريتان استاناسىنىڭ باتىسىنداعى ءۇي اسادتىڭ قايىن اتاسىنىڭ اتىنا تىركەلگەن، ونىڭ ورنالاسقان جەرى ناقتى بەلگىسىز.
ۆاشينگتون العاش رەت 2020 جىلى باشار اسادتىڭ ايەلىنىڭ جاقىن تۋىستارىنا سانكتسيا سالدى. سودان كەيىن تىزىمگە اسما اسادتىڭ ءوزى، ونىڭ اكەسى مەن اناسى، سونداي-اق اعاسى فيراس پەن اعاسى ەياد احراس كىردى. سيريانىڭ ەكس-پرەزيدەنتىنىڭ ايەلىنىڭ وتباسى مۇشەلەرىنىڭ بارلىعى ۇلىبريتانيا ازاماتتارى.
ايتا كەتەيىك، سانكتسيالار تىزىمىنە ەنگىزىلگەن تۇلعالار مەن كومپانيالاردىڭ بارلىق مۇلكى مەن اكتيۆتەرى بۇعاتتالادى، اقش ازاماتتارىنا ولارمەن بيزنەس جۇرگىزۋگە تىيىم سالىنادى. ەگەر اقش ازاماتتارى ەمەس تۇلعالار سانكتسيالار تىزىمىندەگىلەرمەن بەلگىلى ءبىر وپەراتسيالار جاساسا، ولار دا سانكتسياعا ۇشىراۋى مۇمكىن.
2020 جىلى اقش باشار اسادقا قارسى "تسەزار زاڭى" دەپ اتالاتىن سانكتسيالىق باعدارلامانى ىسكە قوستى. بۇل زاڭ اقش-قا الەم بويىنشا كەز كەلگەن فيزيكالىق تۇلعالار مەن كومپانيالارعا، ەگەر ولار سيريا ۇكىمەتىن قولداسا نەمەسە سانكتسيا تىزىمىندە تۇرعان تۇلعالارمەن نەمەسە كومپانيالارمەن ىنتىماقتاسسا سانكتسيا سالۋعا قۇقىق بەردى. اقش اسادقا قارسى العاشقى سانكتسيالاردى 2011 جىلى ەنگىزدى، ونى "سيريا حالقىنىڭ ادام قۇقىقتارىن بۇزۋ" جانە "سيرياداعى ساياسي داعدارىستى شەشۋگە كەدەرگى كەلتىرۋ" ءۇشىن جاۋاپتى دەپ اتادى.
مەملەكەتتىك دەپارتامەنتتىڭ ءباسپاسوز حابارلاماسىندا رەسەيدىڭ 17 لاۋازىمدى تۇلعاسىنا قاتىستى ۆيزالىق شەكتەۋلەر ەنگىزىلگەنى ايتىلعان. ولاردى "ۋكراينانىڭ ەگەمەندىگى، اۋماقتىق تۇتاستىعى نەمەسە ساياسي تاۋەلسىزدىگىن بۇزۋ" ءۇشىن ايىپتاپ وتىر. بۇل تۇلعالار رەسەي اسكەرىنىڭ ۋكراينادا باسىپ العان اۋماقتارىندا جالعان سايلاۋلار وتكىزگەنى ءۇشىن سانكتسيالارعا ۇشىراعان. سانكتسياعا ۇشىراعان رەسەيلىك شەنەۋنىكتەردىڭ ەسىمدەرى جاريالانباعان.
