تۇركيانىڭ ىسپارتا پروۆينتسياسىندا ەكى اسكەري تىكۇشاق سوقتىعىستى. سالدارىنان 5 ادام وقيعا ورنىندا قازا تاپسا، اۋىر جاراقات العان 1 اسكەري قىزمەتكەر اۋرۋحانادا كوز جۇمدى. بۇل تۋرالى ەلدىڭ قورعانىس مينيسترلىگى ايتتى، دەپ حابارلايدى «ادىرنا» ءتىلشىسى.
رەسمي مالىمەتتەرگە سۇيەنسەك، قايعىلى جاعداي تۇرىك اسكەري-اۋە كۇشتەرىنىڭ كەزەكتى جاتتىعۋى كەزىندە بولعان. قازىر وقىس وقيعاعا قاتىستى تەرگەۋ ءجۇرىپ جاتىر.
ەل بيلىگى قازا تاپقانداردىڭ تۋىستارىنا كوڭىل ايتىپ، قارۋلى كۇشتەردەگى قاۋىپسىزدىكتى قامتاماسىز ەتۋ باستى ماسەلە بولىپ قالا بەرەتىنىن مالىمدەدى.
