سيريا پرەزيدەنتى باشار اساد ەل استاناسىنان كەتكەنى تۋرالى اقپارات تارادى دەپ حابارلايدى، "ادىرنا" ۇلتتىق پورتالى Reuters جانە Al Hadath اقپارات كوزدەرىنە سىلتەمە جاساپ.
Reuters مالىمەتى بويىنشا، اساد جەكسەنبى كۇنى ديماشىقتان بەلگىسىز باعىتقا ۇشىپ كەتكەن. سيرياداعى ادام قۇقىقتارىن ساقتاۋ جونىندەگى مونيتورينگ ورتالىعى ونىڭ قالانى سەنبى كۇنى تۇندە ساعات ون شاماسىندا تاستاعانىن مالىمدەدى.
وپپوزيتسيالىق كۇشتەر ديماشىق قالاسىنا كىرگەندەرىن جاريالادى.
يسلامشىل كوتەرىلىسشىلەردىڭ كۇشتەرى تۇندە سيريا استاناسى ديماشىققا كىرگەنىن اقپارات اگەنتتىكتەرى حابارلادى. جەرگىلىكتى تۇرعىندار AFP اگەنتتىگىنە قالادا قاتتى اتىس دىبىستارىن ەستىگەندەرىن ايتتى. كوتەرىلىسشىلەر كواليتسياسى الەۋمەتتىك جەلىلەردە «تيران قاشىپ كەتتى» دەپ حابارلاپ، ەل استاناسى بوساتىلدى دەپ مالىمدەدى.
سيريا پرەزيدەنتى باشار اساد ديماشىقتى «بەلگىسىز باعىتتا» تاستاپ كەتكەنىن، ەكى جوعارى لاۋازىمدى سيريالىق ارميا وفيتسەرى Reuters اگەنتتىگىنە حابارلادى. بۇل اقپاراتتى بۇعان دەيىن CNN تەلەارناسى تاراتىپ، سيريالىق قۇقىق قورعاۋشى ورتالىق (SOHR) تا راستاپ بەردى. ۇيىم باسشىسى رامي ابدەل راحماننىڭ ايتۋىنشا، اساد ديماشىق حالىقارالىق اۋەجايىنان ۇشىپ كەتكەن.
باشار اسادانىڭ كەتۋى تۋرالى العاشقى حابارلار كەشە پايدا بولعان. بىراق سيريا پرەزيدەنتىنىڭ كەڭسەسى ولاردى تەرىسكە شىعارعان ەدى.
Bloomberg اقپارات كوزى اساد اقش-تىڭ جاڭا پرەزيدەنتى دونالد ترامپپەن كەلىسسوزدەر جۇرگىزۋ ۇسىنىسىمەن شىققانىن ايتادى. اتاپ ايتقاندا، سيريا پرەزيدەنتى اقش-قا ديماشىق پەن تەگەران اراسىنداعى ىنتىماقتاستىقتى توقتاتۋ ءۇشىن ءوز ىقپالىن پايدالانۋ ارقىلى اسكەري قاقتىعىستاردى توقتاتۋعا ۋادە بەرگەن.
سيريا پرەمەر-ءمينيسترى ال-دجاليلي Facebook جەلىسىندە تاراعان ۆيدەودا ۇكىمەتتىك وكىلەتتىكتەردى كەز كەلگەن سيريا حالقى بەكىتكەن جاڭا باسقارۋشىعا تاپسىرۋعا دايىن ەكەنىن مالىمدەدى.
كوتەرىلىسشىلەر كواليتسياسى ەلدەن كەتكەن سيريالىقتاردى «ەركىن سيرياعا ورالۋعا» شاقىردى.
ديمماشىق ورتالىعىندا حالىقتىق قۋانىش باستالدى، دەپ حابارلايدى Reuters اگەنتتىگى كۋاگەرلەرگە سىلتەمە جاساپ. كوشەلەردە ادامدار قول سوعىپ، كەيبىرى ناماز وقي باستادى. الەۋمەتتىك جەلىلەردە جەرگىلىكتى تۇرعىنداردىڭ تانككە ءمىنىپ، قۋانىشتان ءان ايتىپ جاتقانى تۇسىرىلگەن بەينەمازمۇندار تارادى.
اسكەريلەر سەدنايا تۇرمەسىنەن مىڭداعان تۇتقىننىڭ بوساتىلعانىن مالىمدەپ، "تيراندىق ءداۋىردىڭ اياقتالعانىن" جاريالادى. بۇل تۇرمە 2011 جىلدان بەرى ازاماتتىق تۇتقىندار مەن كوتەرىلىسشىلەرگە ارنالعان جاپپاي ازاپتاۋ مەن ءولىم جازاسىمەن بەلگىلى، دەپ مالىمدەيدى سيريا ادام قۇقىقتارى بويىنشا مونيتورينگ ورتالىعى.
تۇندە يسلاميستتەر سيريانىڭ سولتۇستىگىندەگى ستراتەگيالىق ماڭىزدى ءارى ءۇشىنشى ءىرى قالا حومستى تولىق باقىلاۋعا العانىن حابارلادى. بۇل قالاعا باقىلاۋ ورناتۋ ازاماتتىق سوعىستا ماڭىزدى كەزەڭ سانالادى.
قارۋ-جاراق كوتەرگەن توپتار قاراشا ايىنىڭ سوڭىندا پرەزيدەنت باشار اسادتىڭ ۇكىمەت اسكەرىمەن سوعىس باستادى. بىرنەشە كۇننىڭ ىشىندە ولار ەلدىڭ ەكىنشى ءىرى قالاسى الەپپونى باسىپ الىپ، بىرنەشە ءىرى قالالاردى باقىلاۋعا العان.
