الماتىدا 2025 جىلى ۇلكەن الماتى شاتقالىنىڭ ەڭ كورنەكتى نىساندارىنىڭ ءبىرى - «الما-اراسان» رادون كوزىن رەكونسترۋكتسيالاۋ جوسپارلانۋدا.
الماتى ءماسليحاتىنىڭ الداعى سەسسياسىندا 2025-27 جىلدارعا ارنالعان بيۋدجەتتىڭ ءتيىستى جوباسىن قاراۋ جوسپارلانۋدا. بۇل تۋرالى قالالىق ءماسليحاتتىڭ ءباسپاسوز قىزمەتى حابارلادى.
بىرەگەي ەمدىك قاسيەتتەرىمەن تانىمال ورىن تۋريستەر مەن قالا تۇرعىندارىن، قازاقستاندىقتاردى عانا ەمەس، شەتەلدىكتەردى دە وزىنە تارتادى. قازىرگى ينفراقۇرىلىمنىڭ جاعدايىنا، قولايسىزدىقتار مەن تاۋەكەلدەرگە بايلانىستى قالا تۇرعىندارى مەن تۋريستەردىڭ كوپتەگەن شاعىمدارىنا جاۋاپ رەتىندە كەشەندى جاڭارتۋ تۋرالى شەشىم قابىلداندى.
رادون كوزىن سوڭعى جوندەۋ 2019 جىلى جۇرگىزىلدى، سودان بەرى ونىڭ ينفراقۇرىلىمى جايلىلىق پەن قاۋىپسىزدىكتىڭ زاماناۋي ستاندارتتارىنا سايكەس كەلۋ ءۇشىن رەكونستۋركتسيالاۋدى قاجەت ەتەدى.
اباتتاندىرۋ جوباسى ينفراقۇرىلىم وبەكتىلەرىن تولىق رەكونسترۋكتسيالاۋدى كوزدەيدى. نەگىزگى ءىس-شارالاردىڭ قاتارىندا قاۋىپسىز سىرعاناۋعا قارسى جابىندارى بار جاڭا كوپىرلەر ورناتۋ، جول جەلىسىن جانە جاياۋ جۇرگىنشىلەر ايماقتارىن جاڭارتۋ بار. ەڭ قاۋىپتى ۋچاسكەلەردە قورشاۋلارى بار باسپالداقتار ورناتىلادى، سونداي-اق زاقىمدالعان ەلەمەنتتەردى كۇشەيتۋ جانە اۋىستىرۋ جۇرگىزىلەدى. سونىمەن قاتار، بارلىق ۋچاسكەلەردىڭ پالۋباسى بولات توردان جاسالادى، بۇل جازدا دا، قىستا دا قاۋىپسىزدىكتى قامتاماسىز ەتەدى.
سونىمەن قاتار، جوبا تۋريستەرگە رەلەفتى باعدارلاۋعا كومەكتەسەتىن، سونداي-اق رادون كوزىنىڭ ەمدىك قاسيەتتەرىمەن تانىستىراتىن جاڭا كورسەتكىشتەر مەن اقپاراتتىق ستەندتەردى ورناتۋدى قامتيدى.
