الماتى وبلىسى كەگەن اۋدانىنىڭ ورتالىعىندا مەملەكەت جانە قوعام قايراتكەرى زامانبەك نۇرقادىلوۆكە ارنالعان ەسكەرتكىش-ءبيۋستتىڭ اشىلۋ سالتاناتى ءوتتى. بۇل تۋرالى بۇگىن، 2 جەلتوقساندا وبلىس اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«بۇل شارا پرەزيدەنت قاسىم-جومارت توقاەۆتىڭ تاپسىرماسى اياسىندا جۇزەگە اسىرىلدى. سونىمەن قاتار، كەگەن اۋىلىنداعى بالالار ونەر مەكتەبىنە زامانبەك نۇرقادىلوۆتىڭ ەسىمى بەرىلدى»،—دەلىنگەن حابارلامادا.
ەسكەرتكىشتىڭ اشىلۋ ءراسىمى زامانبەك نۇرقادىلوۆ اتىنداعى ونەر مەكتەبىنىڭ الاڭىندا ۇيىمداستىرىلدى. سالتاناتتى شاراعا مەملەكەت جانە قوعام قايراتكەرلەرى، اقىن-جازۋشىلار، تانىمال تۇلعالار مەن قايراتكەردىڭ وتباسى مۇشەلەرى قاتىستى. ەسكەرتكىشتىڭ اشىلۋىن وبلىس اكىمىنىڭ ورىنباسارى نۇرجان قۇدايبەرگەنوۆ، قوعام قايراتكەرلەرى توققوجا ەستەنوۆ پەن بولات نۇرعازيەۆ اشىپ، زامانبەك نۇرقادىلوۆتىڭ ۇلى قايرات نۇرقادىلوۆ ءبيۋستىڭ اشىلۋ ءراسىمىن ورىندادى.
وبلىس اكىمىنىڭ ورىنباسارى ءوز سوزىندە قايراتكەردىڭ ەل دامۋىنا قوسقان زور ۇلەسىن اتاپ ءوتىپ، ونىڭ ەڭبەگىنىڭ ۇلت تاريحىندا ماڭگى ساقتالاتىنىن جەتكىزدى.
«بۇل ەسكەرتكىش – حالقىمىزدىڭ قايراتكەرگە دەگەن شىنايى قۇرمەتىنىڭ بەلگىسى. ۇلت جاناشىرى رەتىندە زامانبەك نۇرقادىلوۆ ەل ەگەمەندىگىنىڭ نىعايۋىنا ەلەۋلى ۇلەس قوستى. وسىنداي تۇلعالاردىڭ ەڭبەگىن ۇرپاققا مۇرا ەتۋ – ءبىزدىڭ ورتاق پارىزىمىز. سونداي-اق بيىكتىگى 4,5 مەتر بولاتىن بۇل تۋىندىنىڭ اۆتورلارى ايدوس بۇركىتباەۆ پەن تيمۋر نۇرمۇحامەتوۆكە العىسىمىزدى بىلدىرەمىز»،—دەدى ول.
ءوزىنىڭ ادالدىعىمەن جانە شىنشىلدىعىمەن تانىمال بولعان، سونىمەن قاتار ەكس-پرەزيدەنت نۇرسۇلتان نازارباەۆتى اشىق سىناۋدان قورىقپايتىن، ءومىرىنىڭ سوڭىندا وپپوزيتسيادا بولعان زامانبەك نۇرقادىلوۆ 2005 جىلدىڭ 12 قاراشاسىندا الماتىداعى ءوز ۇيىندە ءولى كۇيىندە تابىلعان. رەسمي مالىمەت بويىنشا، 61 جاستاعى بەلسەندى ءوز-وزىنە قول جۇمساعان-مىس.
زامانبەك نۇرقادىلوۆ ءوز پىكىرىن ايتۋدان، بيلىك باسىنداعىلاردى سىناۋدان قورىقپايتىن ءپرينتسيپشىل ساياساتكەر رەتىندە قازاقستان تاريحىندا ءىزىن قالدىردى. ول جىلدار بويى «كازسەلەزاششيتانى» باسقاردى، «گلاۆالماتىستروي» مەكەمەسىن باسقاردى، ءبىر كەزدە قۇرىلىسشى مەن وپەراتوردىڭ جۇمىسىن قاتار الىپ ءجۇردى – الماتى قالالىق اتقارۋ كوميتەتىندە قۇرىلىس بولىمىندە نۇسقاۋشى بولدى. الماتى قالاسى مەرى بولىپ تۇرعاندا كوپتەگەن داۋلى ماسەلەلەرمەن بەتپە-بەت كەلگەن.
1985 جىلى – قايتا قۇرۋ قارساڭىندا قالالىق اتقارۋ كوميتەتىنىڭ توراعاسى بولدى. 1990 جىلى ءحىى سايلانعان جوعارعى كەڭەستىڭ دەپۋتاتى بولدى.
1991 جىلدىڭ كوكتەمىندە نۇرقادىلوۆ قالالىق حالىق دەپۋتاتتارى كەڭەسىنىڭ توراعاسى جانە ءبىر مەزگىلدە كوممۋنيستىك پارتيا قالالىق كوميتەتىنىڭ ءبىرىنشى حاتشىسى بولدى. ودان كەيىن ول سول كەزدەگى استانا الماتى اكىمشىلىگىنىڭ باسشىسى بولىپ تاعايىندالدى. سول قىزمەتىندە ءجۇرىپ بيلىكتى سىناعان سەنساتسيالىق سۇحباتىنان كەيىن الماتى قالاسىنىڭ اكىمى قىزمەتىنەن كەتەدى، ال 1995 جىلى جەلتوقساندا ول جەڭىسكە جەتكەن ماجىلىسكە العاشقى سايلاۋدا ءوز كانديداتۋراسىن ۇسىنادى. دەپۋتات بولعان سوڭ ۇكىمەتتى سىناي باستايدى.
وسى كەزەڭدە ونىڭ نازارباەۆپەن اشىق تەكەتىرەسى باستالدى دەگەن بولجام بار. ودان كەيىن الماتى وبلىسىن باسقارىپ، تالدىقورعانمەن بىرىگىپ، توتەنشە جاعدايلار اگەنتتىگىنىڭ توراعاسى بولىپ، اۋدانداعى ماسەلەلەردى كوتەردى.
2024 جىلى 23 مامىردا الماتىدا مەملەكەت جانە قوعام قايراتكەرى زامانبەك نۇرقادىلوۆ تۇرعان ۇيگە ەسكەرتكىش تاقتا دا ورناتىلعان. بيلىكتىڭ نۇرقادىلوۆتى شەكتەۋلى بولسا دا ۇلىقتاۋى "جاڭا قازاقستان" تۇسىنىگىنىڭ تاراۋىنا سەبەپ بولعان. ونىڭ كەگەندەگى ءمۇسىنىن اشۋ اۋەلدە 25 قازانعا جوسپارلانعان. الايدا ساياساتكەردىڭ العاشقى زايىبى نۇربيكە نۇرقادىلوۆا دۇنيە سالىپ، ەسكەرتكىشتى اشۋ ءراسىمى كەيىنگە سىرعىتىلعان.
