تاشكەنتتە وتكەن تۇرىك دۇنيەسى پوەزيا فەستيۆالى اياقتالدى، دەپ حابارلايدى "ادىرنا" ۇلتتىق پورتالى.
تۇركىتىلدەس ەلدەردىڭ شايىرلارى كەزەكتى رەت وزبەك ەلىنىڭ استاناسىندا باس قوستى. ەكى جىلدا ءبىر وتەتىن جىر مەرەكەسى بيىل 16-شى رەت ۇيىمداستىرىلىپ وتىر. فەستيۆالدىڭ نەگىزگى ۇيىمداستىرۋشىسى تۇركيا جازۋشىلار وداعى مەن وزبەكستان جازۋشىلار وداعى جانە تۇركيا مادەنيەت مينيسترلىگىنىڭ تيكا ۇيىمى. قولداۋشىسى تۇركسوي حالىقارالىق ۇيىمى.
تۇركسوي حالىقارالىق ۇيىمى «تۇركى پوەزياسى» فەستيۆالىن 1992 جىلدان بەرى ۇيىمداستىرىپ كەلەدى. وسى ۋاقىت ارالىعىندا جىر مەرەكەسى الماتى، تۇركىستان، بۇرسا، بىشكەك پەن باكۋ سەكىلدى باۋىرلاس ەلدەردىڭ ءىرى شاحارلارىندا وتكەن.
توقساننان استام اقىن قاتىسقان القالى جيىندا 4 ءتۇرلى ءمۇشايرا وتكىزىلدى.
فەستيۆال قورىتىندىسىندا 3 باس جۇلدە - “التىن قالامنىڭ” ءبىرى مەحمەد دوعان اتىنداعى سىيلىق - سەرتيفيكاتى ۇلىقبەك ەسداۋلەتكە بەرىلدى. سونىمەن قاتار، “تۇركيا جازۋشىلار وداعىنىڭ قۇرمەتتى مۇشەسى” دەگەن كۋالىك تاپسىرىلدى.
بۇل تۋرالى ول ءوزىنىڭ الەۋمەتتىك جەلى پاراقشاسىندا ءبولىستى.
"فەستيۆالدى ۇيىمداستىرۋشىلار مەنىڭ ەسكەرۋسىز قالىپ بارا جاتقان 70 جاس مەرەيتويىما بايلانىستى وسىنداي قۇرمەت كورسەتتى دەپ ءتۇسىندىم"- دەپ جازدى ۇلىقبەك ەسداۋلەت.
ۇلىقبەك ەسداۋلەت - اقىن، جۋرناليست، قازاقستاننىڭ ەڭبەك سىڭىرگەن قايراتكەرى، قازاقستاننىڭ مەملەكەتتىك سىيلىعىنىڭ جانە قازاقستان لەنين كومسومولى سىيلىعىنىڭ يەگەرى. «ۇلىستىڭ ۇلى كۇنى»، «اق كەرۋەن»، «جاراتىلىس»، «جۇرەكتەگى جارىلىستار»، «كيىز كىتاپ» كىتاپتارىنىڭ، «احيللەستىڭ وكشەسى» ولەڭدەر جيناعىنىڭ اۆتورى.
2018-2023 جىلدار ارالىعىندا قازاقستان جازۋشىلار وداعىنىڭ توراعاسى قىزمەتىن اتقارعان.
