قىرعىزستاندا ەلەكتروندى تەمەكىگە تىيىم سالىندى. ءتيىستى زاڭعا ەل پرەزيدەنتى سادىر جاپاروۆ قول قويدى، دەپ حابارلايدى "ادىرنا" ۇلتتىق پورتالى.
تىيىم 2025 جىلدىڭ 1 شىلدەسىندە كۇشىنە ەنەدى. وسى كۇننەن باستاپ قىرعىزستانعا قۇرامىندا نيكوتين سۇيىقتىعى بار ەلەكتروندى تەمەكىنى اكەلۋگە، سونداي-اق ولاردى ەل اۋماعىندا ساتۋعا نەمەسە پايدالانۋعا تىيىم سالىنادى.
"باستاما ازاماتتاردىڭ دەنساۋلىعىن جاڭا بۋىنداعى تەمەكى ونىمدەرىنىڭ تەرىس اسەرىنەن قورعاۋعا باعىتتالعان", – دەلىنگەن رەسمي حابارلامادا.
زاڭعا سايكەس، تىيىمدى بۇزعاندارعا اۋىر ايىپپۇلدار سالىنادى. جەكە تۇلعالارعا ەلەكتروندىق تەمەكىنى پايدالانعانى ءۇشىن 100 ەسەپتىك كورسەتكىش، ولاردى ساتقانى ءۇشىن – 200 ەسەپتىك كورسەتكىش كولەمىندە ايىپپۇل تاڭايىندالادى. ال زاڭدى تۇلعالار ءۇشىن ايىپپۇل 600 جانە 650 ەسەپتىك كورسەتكىش مولشەرىندە.
ەلەكتروندى تەمەكىلەردى زاڭسىز اكەلۋ دە قىلمىستىق جاۋاپكەرشىلىككە جاتادى. ەلەۋلى كولەمدە اكەلگەن جاعدايدا، ءبىر جىلعا دەيىن تۇزەتۋ جۇمىستارىنا نەمەسە 1000–1200 ەك كولەمىندە ايىپپۇلعا تارتىلادى. كوپ مولشەردە اكەلۋ جاعدايىندا ايىپپۇل 2000 ەك دەيىن ءوسىپ، ەكى جىلعا دەيىن باس بوستاندىعىنان ايىرۋ جازاسى بەرىلەدى.
قازاقستاندا ۆەيپتەرگە تىيىم 2024 جىلدىڭ 20 ماۋسىمىنان باستاپ تىيىم سالىنعان. "قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا پرەزيدەنت قاسىم-جومارت توقاەۆ 2024 جىلعى 19 ساۋىردە قول قويعان ەدى.
