رەسەي اسكەري كۇشتەرى 17 قاراشا كۇنى تاڭەرتەڭ بىرنەشە ۋكراينا ايماقتارىن زىمىرانمەن اتقىلادى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
ۋكراينا قارۋلى كۇشتەرىنىڭ اۋە كۇشتەرى ستراتەگيالىق بومبالاۋشى تۋ-95مس ۇشاقتارىنان ۇشىرىلعان قاناتتى زىمىراندار تۋرالى مالىمدەدى. زىمىرانداردىڭ ۇشىرىلۋى كيەۆ ۋاقىتىمەن 06:00-دە بولعان. قاراتەڭىز اكۆاتورياسىنان «كاليبر» قاناتتى زىمىراندارى جىبەرىلىپ، ميگ-31 ۇشاقتارىنان گيپەردىبىستىق «كينجال» زىمىراندارىنىڭ ۇشىرىلعانى تىركەلدى.
بۇدان بولەك، تۇندە بىرنەشە ۋكراين وبلىستارى ۇشقىشسىز ۇشاقتارمەن شابۋىلعا ۇشىرادى. اكىمشىلىك مالىمەتتەرىنە سايكەس، زاپوروجە، نيكولاەۆ، حاركوۆ جانە كيەۆتە جارىلىستار بولدى. جارىلىستار ودەسسا، دنەپر، كريۆوي روگ جانە چەركاسس وبلىستارىندا دا ەستىلگەن.
نيكولاەۆتا ۇشقىشسىز ۇشاقتىڭ تۇرعىن ۇيگە جاساعان سوققىسىنان ەكى ادام قازا تاۋىپ، تاعى دا ءتورت ەرەسەك ادام مەن ەكى بالا جاراقات العانىن حابارلادى وبلىستىق اسكەري اكىمشىلىك باسشىسى ۆيتالي كيم Telegram-دا.
كيەۆ مەرى ۆلاديمير كليچكو پەچەرسك اۋدانىندا ۇشقىشسىز ۇشاقتىڭ سىنىعى تۇسكەن تۇرعىن ءۇيدىڭ ورتەنىپ، ايەل ادام جاراقاتتانىپ اۋرۋحاناعا جەتكىزىلگەنىن حابارلادى.
گەرمان گالۋششەنكونىڭ ايتۋىنشا، رەسەيدىڭ جاپپاي شابۋىلىنىڭ ماقساتى - ۋكرايناداعى ەنەرگەتيكالىق نىساندار. جۇيە وپەراتورلارى شۇعىل تۇردە ەلەكتر قۋاتىن ءوشىرۋ ءتارتىبىن ەنگىزدى. جەرگىلىكتى بيلىك كيەۆ، ودەسسا، يۆانو-فرانكوۆسك، دنەپروپەتروۆsk, چەركاسس، حمەلنيتسك جانە دونەتسك وبلىستارىندا ەلەكتر قۋاتىن وشىرگەندەرىن حابارلادى.
ۋكراينا سىرتقى ىستەر ءمينيسترى اندرەي سيبيگا ەنەرگەتيكالىق ينفراقۇرىلىمعا جاسالعان شابۋىلدى تولىق ماسشتابتى سوعىستىڭ ەڭ ءىرى شابۋىلدارىنىڭ ءبىرى دەپ اتادى. «بۇل ءپۋتيننىڭ جاقىندا وعان قوڭىراۋ شالىپ، ونىمەن كەزدەسۋ جاساعاندارعا اسكەري قىلمىسكەر رەتىندەگى ناعىز جاۋابى. بىزگە كۇشپەن قول جەتكىزۋگە بولاتىن بەيبىتشىلىك قاجەت، قۇر سوزدەرمەن ەمەس»، – دەپ جازدى ول ح الەۋمەتتىك جەلىسىندە.
ۋكراينا پرەزيدەنتى ۆلاديمير زەلەنسكي رەسەي اسكەري كۇشتەرى ۋكرايناعا شابۋىل جاساۋ ءۇشىن شامامەن 120 زىمىران مەن 90 ۇشقىشسىز ۇشاق قولدانعانىن مالىمدەدى. اۋە قورعانىس كۇشتەرى 140-تان استام اۋە نىسانىن جويدى.
رەسەيدىڭ ۋكرايناعا زىمىراندار مەن ۇشقىشسىز ۇشاقتارمەن جاساعان شابۋىلى سالدارىنان پولشا اسكەري باسشىلىعى ءوز اۋماعىنداعى اۋە كەڭىستىگىن قورعاۋ ءۇشىن يسترەبيتەلدەردى ۇشىردى.
