Reseı áskerı kúshteri 17 qarasha kúni tańerteń birneshe Ýkraına aımaqtaryn zymyranmen atqylady, dep habarlaıdy "Adyrna" últtyq portaly DW-ge silteme jasap.
Ýkraına Qarýly kúshteriniń Áýe kúshteri strategııalyq bombalaýshy Tý-95ms ushaqtarynan ushyrylǵan qanatty zymyrandar týraly málimdedi. Zymyrandardyń ushyrylýy Kıev ýaqytymen 06:00-de bolǵan. Qarateńiz akvatorııasynan «Kalıbr» qanatty zymyrandary jiberilip, MıG-31 ushaqtarynan gıperdybystyq «Kınjal» zymyrandarynyń ushyrylǵany tirkeldi.
Budan bólek, túnde birneshe ýkraın oblystary ushqyshsyz ushaqtarmen shabýylǵa ushyrady. Ákimshilik málimetterine sáıkes, Zaporoje, Nıkolaev, Harkov jáne Kıevte jarylystar boldy. Jarylystar Odessa, Dnepr, Krıvoı Rog jáne Cherkass oblystarynda da estilgen.
Nıkolaevta ushqyshsyz ushaqtyń turǵyn úıge jasaǵan soqqysynan eki adam qaza taýyp, taǵy da tórt eresek adam men eki bala jaraqat alǵanyn habarlady oblystyq áskerı ákimshilik basshysy Vıtalıı Kım Telegram-da.
Kıev meri Vladımır Klıchko Pechersk aýdanynda ushqyshsyz ushaqtyń synyǵy túsken turǵyn úıdiń órtenip, áıel adam jaraqattanyp aýrýhanaǵa jetkizilgenin habarlady.
German Galýenkonyń aıtýynsha, Reseıdiń jappaı shabýylynyń maqsaty - Ýkraınadaǵy energetıkalyq nysandar. Júıe operatorlary shuǵyl túrde elektr qýatyn óshirý tártibin engizdi. Jergilikti bılik Kıev, Odessa, Ivano-Frankovsk, Dnepropetrovsk, Cherkass, Hmelnık jáne Donek oblystarynda elektr qýatyn óshirgenderin habarlady.
Ýkraına syrtqy ister mınıstri Andreı Sıbıga energetıkalyq ınfraqurylymǵa jasalǵan shabýyldy tolyq masshtabty soǵystyń eń iri shabýyldarynyń biri dep atady. «Bul Pýtınniń jaqynda oǵan qońyraý shalyp, onymen kezdesý jasaǵandarǵa áskerı qylmysker retindegi naǵyz jaýaby. Bizge kúshpen qol jetkizýge bolatyn beıbitshilik qajet, qur sózdermen emes», – dep jazdy ol H áleýmettik jelisinde.
Ýkraına Prezıdenti Vladımır Zelenskıı Reseı áskerı kúshteri Ýkraınaǵa shabýyl jasaý úshin shamamen 120 zymyran men 90 ushqyshsyz ushaq qoldanǵanyn málimdedi. Áýe qorǵanys kúshteri 140-tan astam áýe nysanyn joıdy.
Reseıdiń Ýkraınaǵa zymyrandar men ushqyshsyz ushaqtarmen jasaǵan shabýyly saldarynan Polsha áskerı basshylyǵy óz aýmaǵyndaǵy áýe keńistigin qorǵaý úshin ıstrebıtelderdi ushyrdy.
