الماتىدا كوپقاباتتى ءۇيدىڭ اۋلاسىندا تۇرعان كولىكتەردىڭ ۇستىنە شىرىگەن اعاش قۇلاپ، كولىكتەر ءبۇلىندى، دەپ حابارلايدى “ادىرنا” ۇلتتىق پورتالى كتك ارناسىنا سىلتەمە جاساپ.
ءۇش اۆتوكولىك بۇلىنگەن. وقىس وقيعا 14 قاراشادا تۇسكى ۋاقىتتا قالانىڭ اۋەزوۆ اۋدانىندا، جاندوسوۆ كوشەسى بويىنداعى ۇيلەردىڭ ءبىرىنىڭ اۋلاسىندا بولعان. قۇتقارۋ قىزمەتىنىڭ ماماندارى سول ماڭعا بارىپ، اۋلانى قۇلاعان اعاشتان تازالاعان، زارداپ شەككەندەر جوق.
اۋدانداعى اعاشتاردى كەسۋ جۇمىستارى مەملەكەتتىك ساتىپ الۋ نەگىزىندە جەكە مەردىگەرگە تاپسىرىلعانى انىقتالدى. بىراق قۇلاعان تال اپاتتىق اعاشتار تىزىمىنە ەنبەپتى.
«اۆتوكولىكتەرگە كەلتىرىلگەن شىعىندى وتەۋ ءۇشىن كولىك يەلەرىنە سوت ورگاندارىنا جۇگىنۋ ۇسىنىلادى. سوت كىنالى تۇلعالاردى انىقتاپ، جاۋاپكەرشىلىكتى تاعايىندايدى. ەگەر سوت شەشىمى زارداپ شەككەن تاراپتىڭ پايداسىنا شىقسا، مەملەكەتتىك ورگاندار تۋىنداعان شىعىندى قازاقستان رەسپۋبليكاسىنىڭ قولدانىستاعى زاڭناماسىنا سايكەس وتەۋگە مىندەتتى»، - دەدى اۋەزوۆ اۋدانى اكىمدىگى كورىكتەندىرۋ ءبولىمىنىڭ باس مامان زاۋرە قالپەنوۆا.
