قازىر شارۋالاردىڭ جاز بويى كۇتىپ-باپتاپ وسىرگەندەرىن جيناپ، ەڭبەك جەمىسىنە كەنەلەتىن بەرەكەلى دە مەرەكەلى شاقتارىنىڭ ءبىرى. سوندىقتان قانت قىزىلشاسىن وسىرۋگە دەن قويعان الاكولدىك ديقاندار دا كۇزدىڭ ءار كۇنىن قالت جىبەرمەي، ناۋقاندىق جۇمىستارعا قاۋىرت ىسكە كىرىسكەن.
اۋدانداعى 7 اۋىلدىق وكرۋگتەگى 14 شارۋا قوجالىعى قانت قىزىلشاسىن وسىرۋمەن اينالىسادى. بيىلعى جىلى اۋدان بويىنشا 644 گەكتار القاپقا ءتاتتى ءتۇبىر ەگىلدى. بۇگىندە 366 گەكتاردان 15829,7 توننا ءونىم جينالىپ، ءار گەكتارىنان 432,5 تسەنتردەن اينالدى. 6689 توننا ءونىم اقسۋ اۋدانىنداعى قانت زاۋىتىنا وتكىزىلدى. بۇگىندە، ءتاتتى ءتۇبىر جيناۋدى 14 شارۋاشىلىقتىڭ 5 شارۋاشىلىعى اياقتاپ، 9 شارۋاشىلىق قۇرىلىمدارى ناۋقاندى جۇرگىزۋدە.
ءونىم جيناۋ ناۋقانىنا قىزۋ كىرىسكەن “Bolat group LTD” جشس-گىنىڭ قانت قىزىلشاسى القابىنا بارىپ قايتتى. شارۋا يەسى بيىلعى جىلى زاماناۋي تامشىلاتىپ سۋارۋ تەحنولوگياسىن پايدالانا وتىرىپ 275 گەكتار القاپقا ءتاتتى ءتۇبىر ءونىمىن سەۋىپ، بۇگىندە 135 گەكتار القاپتان 8100 توننا ءونىم الدى. ءتۇسىم كوز قۋانتادى. جيىم-تەرىم وڭ ناتيجە بەرسە، كەلەسى جىلى 1000 گەكتار القاپقا سەۋىپ، ءونىم كولەمىن مولايتۋدى كوزدەپ وتىر.
جالپى قانت قىزىلشاسى - بابى مەن كۇتىمى كەلىسسە مول ءونىم بەرەتىن ءوسىمتال ءارى تابىستى داقىل. مۇنى قىزىلشا وسىرۋدەن مول تاجىريبە جيناقتاعان كولباي اۋىلىنداعى “سامەت اگرو” شارۋا قوجالىعى دا جاقسى بىلەدى. قوجالىق اۋدانىمىزدىڭ نەگىزگى باسىمدىقتارىنىڭ ءبىرى قانت قىزىلشاسىن 118 گەكتار القاپقا سەپكەن. بۇگىندە، 100 گەكتاردان 3200 توننا ءونىم جيناپ الدى.
اۋدان شارۋالارى ءۇشىن اۋا-رايىنىڭ كومەگى، ەگىستىكتى جاڭبىرلاتىپ، تامشىلاتىپ سۋارۋ ارقىلى سۋدى ۇنەمدى پايدالانۋدىڭ ارقاسىندا قىزىلشانىڭ شىعىمى جاقسى بولدى. ەندىگى ماقسات - الاجازداي كۇتىپ-باپتاعان ءونىمدى كۇزدىڭ قارا سۋىعىنا، جاۋىن-شاشىنعا ۇرىندىرماي ساپالى جيناپ الىپ، ءتيىستى قانت زاۋىتتارىنا وتكىزۋ بولىپ وتىر. بۇل جۇمىستارعا 5 كومباين جۇمىلدىرىلدى.
ديقاندار قىزىل قىرماننىڭ قىزعان شاعىندا مول ءونىم الاتىنىنا سەنىمىمىز مول.
