انكارا گازاداعى جاعدايعا قاتىستى تۇركى الەمىن شەشۋشى پوزيتسيا قابىلداۋعا شاقىردى. بۇل تۋرالى تۇركيا پرەزيدەنتى رەجەپ تايىپ ەردوعان 11-ءشى تۇركى مەملەكەتتەرى ۇيىمىنىڭ سامميتىندە بىشكەكتە سويلەگەن سوزىندە مالىمدەدى، دەپ حابارلايدى "ادىرنا" ۇلتتىق پورتالى.
«تۇركيا گازاداعى قاتىگەزدىك پەن ادامگەرشىلىككە جاتپايتىن قىرعىندى ايىپتايدى. تۇركى الەمىنىڭ ەلدەرى دە بۇل ماسەلەگە قاتىستى شەشۋشى پوزيتسيا ۇستانۋى كەرەك دەپ سانايمىن»، – دەدى تۇركيا پرەزيدەنتى.
ونىڭ ايتۋىنشا، قازىرگى ۋاقىتتا حالىقارالىق قاۋىمداستىق پالەستينا جەرىندە، اسىرەسە گازادا، گەنوتسيدتى توقتاتۋعا قابىلەتتىلىگىن سىناپ جاتىر. ودان بولەك، وڭتۇستىك كاۆكازداعى جاعدايدى ءسوز ەتكەن ەردوعان ازەربايجاننىڭ شەحيدتەردىڭ قانى توگىلۋىمەن جەتكەن تاريحي جەڭىستەرى بەيبىت كەلىسىمگە قول قويۋ ارقىلى نىعايتىلاتىنىنا ۇمىتتەنەتىنىن اتاپ ءوتتى.
پرەزيدەنت ەردوعان تۇركى الەمى ەلدەرىنىڭ بولاشاق دامۋ مۇمكىندىكتەرىنە دە توقتالدى: «ءبىز بۇگىنگە دەيىن كوپتەگەن قيىندىقتاردى ەڭسەردىك، بىراق الدا ءالى ۇزاق جول بار. ءبىز كەلەسى كەزەڭدى «تۇركى الەمىنىڭ عاسىرى» ەتۋ ءۇشىن بارلىق كۇش-جىگەرىمىزدى جۇمسايمىز»، – دەدى ول.
