يسپانيانىڭ ۆالەنسيا ايماعىندا نوسەر جاۋىن مەن بۇرشاق سالدارىنان تۋىنداعان سۋ تاسقىنىنان 62 ادام قازا تاپتى، دەپ حابارلايدى «ادىرنا» ۇلتتىق پورتالى.
بۇل تۋرالى جەرگىلىكتى بيلىك وكىلدەرى مالىمدەدى.
ايماقتىق ۇكىمەت باسشىسى كارلوس مازوننىڭ ايتۋىنشا، زارداپ شەككەن اۋدانداردا قۇتقارۋ وپەراتسياسى جالعاسۋدا، سوندىقتان ناقتى قايتىس بولعانداردىڭ سانىن انىقتاۋ ازىرگە مۇمكىن بولماي تۇر. جەرگىلىكتى باق بالەار ارالدارىندا دا زارداپ شەككەندەر مەن قۇربانداردىڭ بار ەكەنىن حابارلادى. قۇتقارۋ جۇمىستارىنا مىڭنان استام اسكەري قىزمەتكەر تارتىلعان، ولار توتەنشە جاعدايلار قىزمەتىنە كومەكتەسۋدە.
يسپانيا كورولى فيليپپ VI الەۋمەتتىك جەلى پاراقشاسىندا سۋ تاسقىنى كولەمىنە تاڭ قالعانىن جازىپ، اپات قۇرباندارىنىڭ تۋىستارى مەن جاقىندارىنا شىن جۇرەكتەن كوڭىل ايتتى.
يسپان مەتەورولوگتارىنىڭ مالىمەتىنشە، ۆالەنسيادا سەگىز ساعات ىشىندە 491 مم جاۋىن-شاشىن تۇسكەن، بۇل كولەم شامامەن ءبىر جىلدىق نورمانىڭ مولشەرىنە سايكەس كەلەدى.
الەۋمەتتىك جەلىلەردە سۋ تاسقىنىنىڭ كوپىرلەر مەن كولىكتەردى اعىزىپ اكەتكەنى، ال ادامداردىڭ كەيبىر جاعدايلاردا اعاشتارعا شىعىپ، سۋ تاسقىنىنان قۇتىلۋعا تىرىسقانى كورسەتىلگەن بەينەلەر جاريالانۋدا.
كۇشتى جەل ەلەكتر سىمدارىن ۇزگەندىكتەن، ۆالەنسياداعى 150 مىڭنان استام ءۇي جارىقسىز قالدى. ەلەكتر ەنەرگياسىن جەتكىزۋشى Iberdrola كومپانياسى ناشار اۋا-رايىنا بايلانىستى جوندەۋ جۇمىستارىنىڭ ءبىراز ۋاقىت الاتىنىن حابارلادى.
ۆالەنسياعا قونۋى ءتيىس كەيبىر اۋە رەيستەرى توقتاتىلدى نەمەسە باسقا ايماقتارعا باعىتتالدى. ايماقتاعى تەمىرجول قاتىناسى دا تولىقتاي توقتاتىلدى.
جەرگىلىكتى باق حابارلاۋىنشا، ۆالەنسيانىڭ ونداعان تۇرعىنى كومەك كۇتىپ، بۇكىل ءتۇندى كولىكتەرىندە، شاتىرلاردا جانە كوپىرلەردە وتكىزگەن. كەشە بيلىك كەم دەگەندە جەتى ادامنىڭ ۆالەنسيا مەن وڭتۇستىك-شىعىستاعى الباسەتە پروۆينتسياسىندا جوعالعانىن مالىمدەدى.
