ساران قالاسىنىڭ اكىمى ەركىن باۋلىقوۆ پەن قاراعاندى وبلىسىنىڭ ەنەرگەتيكا جانە تكش باسقارماسىنىڭ باسشىسى تىلەكتەس دوساەۆ قاتاڭ سوگىس الدى. بۇل تۋرالى بۇگىن وبلىس اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
باسشىلار قالانى جىلۋمەن قامتۋدا ولقىلىق جىبەرگەن. سالدارىنان بىرنەشە ءۇي جىلۋسىز قالدى.
بۇدان بولەك، وبلىس اكىمىنىڭ ءبىرىنشى ورىنباسارى ازامات تايجانوۆقا ەسكەرتۋ تۇرىندە تارتىپتىك جازا جاريالاندى.
«قىزمەتتىك مىندەتتەرىن تيىسىنشە ورىنداماعانى ءۇشىن، اتاپ ايتقاندا، جىلىتۋ ماۋسىمىنا دايىندىقتى جەتە باقىلاماعانى ءۇشىن جازالاندى. قىس مەزگىلىندە ساپالى جىلۋمەن قامتاماسىز ەتۋ ءبىز ءۇشىن باستى مىندەت ەكەنىن تاعى ءبىر مارتە ەسكە سالعىم كەلەدى. جۇمىس ۇزدىكسىز جۇرگىزىلۋى كەرەكچ ءار جاعدايعا قاتاڭ باعا بەرىلىپ، جاۋاپكەرشىلىك دارەجەسى انىقتالادى»،— دەدى وبلىس اكىمى ەرماعانبەت بولەكپاەۆ.
ەسكە سالا كەتەيىك، ەكى اپتا بۇرىن ساران تۇرعىندارى ۇيلەرىندە جىلۋ جوق ەكەنىن ايتىپ شاعىمدانعان ەدى.
