وقۋ-اعارتۋ مينيسترلىگى ءبىلىم بەرۋ ۇيىمدارىنىڭ اۋماعىندا ءارتۇرلى سىلتاۋلارمەن زاڭسىز اقشا جيناۋعا مۇعالىمدەردى تارتۋ زاڭسىز ەكەنىن ەسكەرتتى، دەپ حابارلايدى «ادىرنا» ءتىلشىسى.
مينيسترلىك جۋىردا 2 مىڭنان استام ءبىلىم ۇيىمىنىڭ باسشىسى مەن اۋماقتىق دەپارتامەنت وكىلدەرىنىڭ قاتىسۋىمەن كوررۋپتسيالىق تاۋەكەلدەردى الدىن الۋ جانە ەسكەرتۋ ماقساتىندا جينالىس وتكەنىن مالىمدەدى.
«قاتىسۋشىلارعا كوررۋپتسيامەن كۇرەس، باقىلاۋ شارالارىن ۇيىمداستىرۋ، قىزمەتتىڭ ءوزىن ءوزى باعالاۋى تۋرالى جان-جاقتى تۇسىنىكتەمەلەر بەرىلدى. ءبىلىم ۇيىمدارىندا ءارتۇرلى سىلتاۋلارمەن زاڭسىز اقشا جيناۋدىڭ الدىن الۋ ماسەلەلەرىنە، سونداي-اق پەداگوگتاردىڭ كاسىبي قىزمەتىنە قاتىستى زاڭ تالاپتارىنىڭ بۇزىلۋىنا ەرەكشە نازار اۋدارىلدى»،— دەپ حابارلادى وقۋ-اعارتۋ مينيسترلىگى.
قازاقستاندا پەداگوگتاردى كاسىبي قىزمەتىمەن بايلانىستى ەمەس جۇمىستارعا تارتۋ، تاۋارلار مەن قىزمەتتەردى ساتىپ الۋ مىندەتىن جۇكتەۋ زاڭمەن تىيىم سالىنعان. بۇل نورمالاردىڭ بۇزىلۋى زاڭناما شەڭبەرىندە جاۋاپكەرشىلىكتى قاراستىرادى.
«ءبىلىم بەرۋ پروتسەسىنىڭ ءاربىر قاتىسۋشىسى ادالدىق پەن ادىلەتتىلىكتىڭ ۇلگىسىن كورسەتۋگە ءتيىس. كوررۋپتسيانىڭ الدىن الۋعا كومەكتەسۋى قاجەت. ءبىز وسى پرينتسيپتەردىڭ قاتاڭ ساقتالۋىنىڭ ماڭىزدىلىعىنا نازار اۋدارامىز جانە پەداگوگتار مەن ءبىلىم ۇيىمدارىنىڭ باسشىلارىن كوررۋپتسيالىق قۇقىق بۇزۋشىلىقتار تۋرالى حابارلاۋعا شاقىرامىز»،— دەدى ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.
زاڭسىز اقشا جيناۋ فاكتىلەرى نەمەسە باسقا كوررۋپتسيالىق كورىنىستەر انىقتالعان جاعدايدا، دەرەۋ اۋماقتىق دەپارتامەنتتەرگە نەمەسە ءبىلىم مينيسترلىگىنىڭ ساپانى قامتاماسىز ەتۋ كوميتەتىنە +7 (7172) 74-23-92 نومەرى بويىنشا حابارلاسۋ ۇسىنىلادى.
