قازاقستاندا اەس سالۋ ماسەلەسى بويىنشا وتكەن رەسپۋبليكالىق رەفەرەندۋمنىڭ ءۇشىنشى exit-poll ناتيجەسى جاريالاندى، دەپ حابارلايدى «ادىرنا» ءتىلشىسى.
ەۋرازيالىق ينتەگراتسيا ينستيتۋتى Zakon.kz تاپسىرىسى بويىنشا زەرتتەۋ جۇرگىزدى.
ساۋالناما 250 ۋچاسكەنى قامتىدى، ونىڭ 159-ى قالالاردا، 91- ءى اۋىلداردا ورنالاسقان. 30 546 ازامات سۇرالدى. زەرتتەۋ ناتيجەلەرىنىڭ قاتەلىگى 1%-دان اسپايدى. بارلىعى 6 ولشەۋ ۇيىمداستىرىلدى.
Exit-poll دەرەكتەرى بويىنشا ازاماتتاردىڭ 71,8% قازاقستاندا اتوم ەلەكتر ستانتسياسىن سالۋدى قولداپ، 28,2% قارسى داۋىس بەرگەن.
ايتا كەتەيىك، اەس بويىنشا رەفەرەندۋم 6 قازاندا ساعات 07:00-دەن 20:00-گە دەيىن ءوتتى. ورتالىق سايلاۋ كوميسسياسىنىڭ الدىن الا مالىمەتىنشە، ساعات 20:00-دەگى جاعداي بويىنشا ازاماتتاردىڭ 63,87%-ى، 7 820 918 ادام داۋىس بەردى.
ءبىرىنشى exit poll ناتيجەسى بويىنشا رەفەرەندا حالىقتىڭ 69,8 پايىزى اەس قۇرىلىسىن قولدادى. ساۋالنامانى «استانا – كەشەندى الەۋمەتتىك زەرتتەۋلەر ينستيتۋتى» جەكە قورى جۇرگىزدى.
ال AMANAT پارتياسىنىڭ قوعامدىق ساياسات ينستيتۋتىنىڭ exit-poll مالىمەتتەرى بويىنشا، ازاماتتاردىڭ 72,3%-ى اتوم ەلەكتر ستانتسياسىن سالۋدى قولداسا، 27,7% - ى قارسى بولدى.
