«رۋحاني جاڭعىرۋ» بويىنشا ءالى 68 جوبا ىسكە اسادى

1970

«رۋحاني جاڭعىرۋ» باعدارلاماسىنىڭ «تۋعان جەر» جوباسى اياسىندا دەمەۋشىلىك كومەك ەسەبىنەن وبلىستا 200-دەن اسا نىسان پايدالانۋعا بەرىلدى. بۇل تۋرالى جامبىل وبلىسى ىشكى ساياسات باسقارماسىنىڭ باسشىسى داۋىل بەيسەنقۇلوۆ مالىمدەدى، دەپ حابارلايدى adyrna.kz ۇلتتىق پورتالىنىڭ ءتىلشىسى.

داۋىل ىنتىقبايۇلىنىڭ ايتۋىنشا، جىل باسىنان بەرى «رۋحاني جاڭعىرۋ» باعدارلاماسى اياسىندا 80-گە تارتا جوبا جۇزەگە اسىرىلعان. سونداي-اق ول جىل سوڭىنا دەيىن تاعى دا 68 جوبانى ىسكە اسىرۋدى جوسپارلاپ وتىرعانىن مالىمدەدى.

– بيىلعى جوبالاردىڭ ەڭ اۋقىمدىسى ءارى بىرەگەيى ورتاعاسىرلىق ۇلگىدەگى «شاحريستان» مادەني كەشەنى بولماق. وندا ۇلكەن كورمە زالى، وبلىستىق تاريحي ولكەتانۋ مۋزەيى، رۋحانيات ورتالىعى سياقتى نىساندار بوي كوتەرەدى. بۇل جۇمىستاردى جىل سوڭىنا دەيىن اياقتاۋ جوسپاردا. ناقتىراق ايتسام، جامبىل وبلىسىنىڭ 80 جىلدىق مەرەيتويى كەزىندە پايدالانۋعا بەرىلەدى، – دەيدى ول.

جالپى جامبىلدىق كاسىپكەرلەر «تۋعان جەر» جوباسىنا بەلسەندى اتسالىسىپ جاتىر. ناقتىراق ايتساق، وسى جوبانىڭ ارقاسىندا بالاباقشا، سپورت الاڭدارى مەن مەدپۋنكت سياقتى بىرقاتار نىساندار حالىق يگىلىگىنە پايدالانۋا بەرىلدى. مەتسەناتتىق قىزمەتتى تەك كاسىپكەرلەر عانا ەمەس، سونىمەن قاتار سپورتشىلار دا جاساپ جاتىر. ماسەلەن  پاراليمپيادا جەڭىمپازى ءزۇلفيا عابيدۋللينا تاراز قالاسىنداعى مولتەك اۋدانداردىڭ بىرىنە امبەباپ سپورت كەشەنىن اشىپ بەردى.

– اسىر باستاپقىدا بىرنەشە اتكەنشەك پەن اۋلاعا ورىندىقتار عانا ورناتقىم كەلگەن. كەيىن بالالارعا قاراپ جانىم اشىدى. وينايتىن الاڭ جوق.  دوپ تەپسە، ماڭايداعى كولىككە تيەدى. اينالا شاڭ-توزاڭ. بالالار – ءبىزدىڭ بولاشاعىمىز. ولار سپورتپەن تۇراقتى تۇردە شۇعىلدانسا دەيمىن. سوندىقتان دا مەن تاپقان تابىسىمنىڭ ءبىر بولىگىن بالالارعا جۇمساۋدى ءجون سانادىم، –دەيدى پاراليمپيادا ويىندارىنىڭ جەڭىمپازى.

شاعىن سپورت الاڭشاسىندا اتكەنشەكتەردەن بولەك، ەرەسەكتەردىڭ ءبىر مەزگىل تازا اۋادا تىنىعۋىنا جاعداي جاسالعان.  سونداي-اق، دويبى، شاحمات ويىندارىنا ارنالعان ۇستەلدەر دە بار.

ءزۇلفيا عابيدۋللينانىڭ ءىسىن قالا تۇرعىنى گۇلىمحان ابدىراسىلقىزى ازاماتتىق دەپ باعالاپ وتىر. ويتكەنى، ول مۇنداي قايرىمدى ءىستى ون ەكى مۇشەسى ساۋ ازاماتتاردىڭ ءوزى جاساي المايتىنىن ايتادى. سوندىقتان دا گۇلىمحان ابدىراسىلقىزى چەمپيونعا اۋلا تۇرعىندارى اتىنان راحمەت ايتىپ، دەنساۋلىعى مىقتى بولۋىنا تىلەكتەستىگىن جەتكىزدى.

قازىرگى تاڭدا جامبىل وبلىسىندا كوپتەگەن سپورت الاڭشاسى اشىلىپ، وندا بالالار اسىر-سالىپ ويناپ ءجۇر. ماسەلەن جەرگىلىكتى مەتسەنات بەكتوبە اۋىلىنا 7 ميلليون تەڭگەسىنىڭ سپورت الاڭشاسىن اشىپ بەردى. جالپى باعدارلاما قابىلدانعالى 3,9 ميلليارد تەڭگەگە جۋىق قاراجاتقا 300-دەن استام جوبا جۇزەگە اسىرىلعان.

"ادىرنا"

ۇلتتىق پورتالى

پىكىرلەر