دزيۋدودان تۇڭعىش وليمپيادا چەمپيونى، جامبىلدىق ەلدوس سمەتوۆ رەسپۋبليكالىق رەفەرەندۋمعا قاتىسىپ، ءوز تاڭداۋىن جاسادى، دەپ حابارلايدى «ادىرنا» ۇلتتىق پورتالى.
ول تاراز قالاسىنداعى №82 رەفەرەندۋم ۋچاسكەسىنە كەلىپ داۋىس بەردى. مەملەكەت ءۇشىن ماڭىزدى وقيعادا ازاماتتىق پارىزىن ورىنداعان سپورتشى ءوز وتانداستارىنىڭ داۋىسى كەلەشەك ءۇشىن ايرىقشا مانگە يە ەكەنىن اتاپ ءوتتى.
— بۇگىنگى رەفەرەندۋم بارشا قازاقستاندىقتار ءۇشىن ماڭىزدى وقيعا. اتوم ەلەكتر ستانتسياسىن سالۋ نەمەسە سالماۋ تۋرالى تاڭداۋدى حالىقتىڭ ءوزى جاساپ جاتقانىن ءجون دەپ سانايمىن. ءوز وتانداستارىمدى ءوز تاڭداۋلارىن جاساۋعا شاقىرامىن. سەبەبى ەلدىڭ بولاشاعى قاشان دا حالىقتىڭ قولىندا. مەن دە قاراپايىم حالىقتىڭ قاتارىنداعى ازاماتپىن. مەنىڭ دە داۋىسىم ماڭىزدى دەپ ويلايمىن. بۇگىن ءوز تاڭداۋىمدى جاسادىم،- دەدى چەمپيون.
