قوستومار اۋىلىنىڭ جالپى ورتا ءبىلىم بەرەتىن مەكتەبىنە جاڭا 2024-2025 وقۋ جىلىندا استانا قالاسىنىڭ حالىقارالىق ۋنيۆەرسيتەتىن ءبىتىرىپ كەلگەن ۇزدىك تۇلەكتەرىنىڭ ءبىرى – ەلدوس تولەۋحانوۆ «ينفورماتيكا» ءپانى مۇعالىمى بولىپ جۇمىسقا قابىلداندى.
از ۋاقىتقا قاراماستان جاس مامان رەتىندە ەلدوس ساماتۇلى ۇجىممەن، وقۋشىلارمەن تەز ءتىل تابىسىپ، قازىرگى زامان تالابىنا ساي نەگىزگى ءىت ماماندىقتاردىڭ قاتارىنا كىرەتىن ءپاندى يگەرتىپ كەلەدى. ءوزى ءبىلىم العان «ءبىلىم-يننوۆاتسيا» ليتسەيىنەن، AIU ۋنيۆەرسيتەتىنەن ۇيرەنگەنى كوپ، سونى پەداگوگيكا سالاسىندا جەتىلدىرىپ، تاجىريبەسىندە قولدانىپ ءجۇر.
ينفورماتيكا پانىمەن قاتار، ەلدوس ساماتۇلى بىرنەشە ءتىلدى، اتاپ ايتساق: قازاق، ورىس، اعىلشىن، تۇرىك تىلدەرىن جەتىك مەڭگەرىپ، جۇمىس بارىسىندا قولدانۋدا.
«وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» ماقالىن ۇرانعا اينالدىرعان ۇستازىمىز وقۋشىلارعا الدىمەن انا ءتىلىن تولىق ءبىلۋ كەرەكتىگىن ايتادى. ال باسقا الەم تىلدەرى قوسىمشا قىزىعۋشىلىق رەتىندە قاراستىرۋدى ءجون سانايدى. ينفورماتيكا ءپانى بويىنشا كوپتەگەن تەرمين سوزدەردىڭ ماعىناسىن اشىپ، وقۋشىلاردىڭ سول تەرمين سوزدەردى تولىق تۇسىنۋگە مۇمكىندىك جاساۋدا.
ساياحاتتاۋعا جانى قۇمار ەلدوس ساماتۇلى وسى تىلدەردى مەڭگەرۋ ارقىلى ءبىراز شەت ەلدەرگە ساياحاتتاپ، ءتىلىن، مادەنيەتىن، تۇرمىس-تىرشىلىگىن تانۋدا زور ىقپال بولعانىن ايتتى. قازىرگە كەزدە باسقا دا شەت تىلدەرىن قىتاي، فرانتسۋز، يسپان-پورتۋگال تىلدەرىن ۇيرەنىپ ءجۇر.
ايتا كەتەيىك، بيىل وبلىس مەكتەپتەرىنە 1300-دەن استام پەداگوگ كەلدى، ونىڭ ىشىندە 625 جاس مۇعالىم.
