دەنساۋلىق ساقتاۋ ءمينيسترى اقمارال ءالنازاروۆا جەدەل جاردەم جۇمىسىنىڭ وزگەرۋى جايلى تاراعان اقپاراتقا قاتىستى جازبا جاريالادى، دەپ حابارلايدى "ادىرنا" ۇلتتىق پورتالى.
مينيستر ءوزىنىڭ Facebook-تەگى پاراقشاسىندا جازبا جاريالادى. وندا ول جەدەل جاردەم جۇمىسىنىڭ بۇرىنعى قالىپتا، قزگەرىسسىز جۇمىس ىستەيتىنى جايلى جازدى.
"قۇرمەتتى قازاقستاندىقتار! جەدەل جاردەم قىزمەتىنىڭ قاعيدالارىنا وزگەرىستەر ەنگىزۋدى كوزدەيتىن جوبادا حالىققا تاۋلىك بويى كورسەتىلەتىن جەدەل جاردەم قىزمەتتەرىن شەكتەۋ تۋرالى نورما جوق.
حالىق ءۇشىن جەدەل جاردەم 24/7 رەجيمىندە 103 ءنومىرى بويىنشا قولجەتىمدى بولىپ قالا بەرەتىنىن ايتا كەتكەن ءجون" دەپ جازدى ءالنازاروۆا.
سونداي-اق، ول وزگەرىستەردىڭ شاقىرتۋلار شەكتەۋىنە ەمەس كەرىسىنشە ساپاسىنىڭ ارتۋىنا قاتىستى ايتىلعانىن قوسا كەتتى:
"وزگەرىستەر شاقىرتۋلارعا قىزمەت كورسەتۋدىڭ جەدەلدىگى مەن ساپاسىن ارتتىرۋ ماقساتىندا ەمحانالاردىڭ جانىنان قۇرىلاتىن بريگادالارعا قاتىستى. موبيلدىك بريگادالاردىڭ سانىن كوبەيتۋ تۋرالى شەشىم قابىلداندى. بۇدان باسقا، بالالارعا مەديتسينالىق كومەك قاجەت بولعان جاعدايدا، شىعۋ پەدياتردىڭ، ال ەرەسەك تۇرعىندارعا - بەيىندى مامانداردىڭ (كارديولوگ، نەۆروپاتولوگ جانە ت.ب.) قاتىسۋىمەن جۇزەگە اسىرىلادى" دەلىنگەن جازبادا.
سونىمەن قاتار، جەدەل جاردەم بريگاداسىنىڭ سانىن ناقتىلاي كەتتى ول.
"بۇعان دەيىن ءبىر بريگادا 35 مىڭ ادامعا قىزمەت كورسەتسە، جاڭا قاعيدا بويىنشا-25 مىڭ ادامدى قامتيدى.
موبيلدىك بريگادانىڭ جۇمىسى ەمحانا ۇيىمدارىنىڭ جۇمىس ۋاقىتىمەن ۇيلەستىرىلەتىن بولادى. ساعات 20.00-دەن كەيىن جانە دەمالىس كۇندەرى-شاقىرتۋلارعا قىزمەت كورسەتۋدى جەدەل جاردەم بريگادالارى جۇرگىزەدى.
بۇل نورما جەدەل جاردەم قىزمەتىن ۇزاق كۇتۋدىڭ تومەندەۋىنە ىقپال ەتەدى جانە تۇرعىندارعا 103 ءنومىرى بويىنشا جەدەل جاردەمدى شاقىرتۋ ءۇشىن ەشقانداي كەدەرگى جوق" دەپ تۇيىندەدى مينيستر حانىم.
