باتىس قازاقستان وبلىسىنىڭ قازتالوۆ اۋدانىندا «قالادان-اۋىلعا» باعدارلاماسى قارقىندى جۇزەگە اسۋدا. وڭىرلىك باعدارلاما اياسىندا بولاشاق اۋىلدىق وكرۋگىنىڭ جاڭاتاڭ جانە كوپكۇتىر ەلدى مەكەندەرىنەن 4 وتباسى جاڭا باسپاناعا يە بولدى. باسپانالى بولعان وتباسىلاردى وبلىس اكىمى ناريمان تورەعاليەۆ قۇتتىقتاپ، تۇرعىن ءۇي كىلتىن سالتاناتتى تۇردە تابىستادى.
وڭىرىمىزدە مەملەكەت باسشىسىنىڭ تاپسىرماسىمەن بىرقاتار ينفراقۇرىلىمدىق جوبالار، مەملەكەتتىك باعدارلامالار جۇزەگە اسۋدا. ونىڭ سىرتىندا وڭىرلىك باعدارلامالارىمىزدى دا ىسكە قوسىپ جاتىرمىز. سونىڭ ىشىندە «قالادان اۋىلعا» باعدارلاماسى جاس وتباسىلار ءۇشىن، حالىقتىڭ ءال-اۋقاتىن ارتتىرۋ جانە اۋىلدار مەن ەلدى مەكەندەردى دامىتۋعا سەپ بولادى. باعدارلاما اياسىندا قازتالوۆ اۋدانىنا كوشىپ كەلگەن جاس وتباسىلاردى قۇتتىقتايمىن! شاڭىراقتارىڭىز بەرەكەلى بولىپ، قۋانىش پەن شاتتىققا تولسىن! – دەدى وبلىس اكىمى.
اۋداندا جوبا ىسكە اسىرىلاتىن اۋىلداردا 16 تۇرعىن ءۇي ساتىپ الىنۋدا. بۇگىندە اۋىلدارعا قۇرامىندا 78 ادام بار (سونىڭ ىشىندە 50 بالا) 14 وتباسى كوشىپ كەلىپ، ۋاقىتشا ۇيلەرگە ورنالاستىرىلدى. بارلىق وتباسىلار تۇراقتى جۇمىسپەن قامتىلىپ، مەكتەپ جاسىنداعى 24 بالا مەكتەپكە، 25 بالا مەكتەپكە دەيىنگى ۇيىمدارعا ورنالاستى.
جاڭاتاڭ ەلدى مەكەنىندەگى سالتاناتتى ءىس-شارادا سيسەنوۆتار مەن سۇندەتوۆتەر وتباسى (جاڭاتاڭ ەلدى مەكەنى), جاكۋپوۆتار مەن ابدراحمانوۆتار (كوپكۇتىر ەلدى مەكەنى) وتباسى جاڭا باسپاناعا يە بولدى. باعدارلامانىڭ يگىلىگىن كورگەن سيسەنوۆتار جانۇياسىنىڭ وتاناسى شىناراي تورەمۇراتوۆا قۋانىشىمەن ءبولىسىپ، وبلىس باسشىلىعىنا ريزاشىلىعىن ءبىلدىردى.
– وبلىس اكىمى ناريمان تورەعاليۇلىنىڭ باستاماسىمەن جۇزەگە اسقان جوبانىڭ ناقتى جەمىسى. «قالادان-اۋىلعا» باعدارلاماسىنا قاتىسۋشى وتباسىلاردىڭ اتىنان شىنايى ريزاشىلىعىمىزدى بىلدىرەمىن. باعدارلاما ارقىلى قازتالوۆ اۋدانىنىڭ جاڭاتاڭ اۋىلىنا اقپان ايىنىڭ باسىندا كوشىپ كەلگەن بولاتىنبىز. قالادان كوشىپ كەلۋ بارىسىندا جەرگىلىكتى اتقارۋشى ورگاندار بارلىق مۇمكىندىكتى قاراستىرىپ، ۋاقىتشا تۇرعىن ۇيمەن جانە سيىر، قوي مەن ەشكى مالدارىمەن قامتاماسىز ەتتى. قازىر سول ءتورت تۇلىكتىڭ يگىلىگىن كورۋدەمىز. جولداسىم ايات ەكەۋىمىزدى تۇراقتى جۇمىسقا ورنالاستىردى. جولداسىم مەردىگەرمەن بىرگە وسى ءۇيدىڭ سالىنۋىنا اتسالىستى. وزەگىنەن تەپپەي، قۇشاق جايا قارسى العان اۋىل حالقىنا دا العىسىمىز شەكسىز! – دەدى ول.
سالتاناتتى ءىس-شارادا جاس وتباسىلارعا تۇرعىن ءۇي كىلتىمەن قاتار، ەكى باس ءىرى قارا جانە 10 باس قوي مەن ەشكىنىڭ سەرتيفيكاتى تابىستالدى. ال اۋىلدىڭ باتاگوي اقساقالى مۋسين ەسماعۇل جاس وتباسىلارعا اق باتاسىن بەردى.
ايتا كەتەيىك، قوس ەلدىمەكەندە تۇرعىن ءۇي قۇرىلىستارىن جەكە ينۆەستورلار مەيىربەك فاتيحوۆ جانە امانجول كەرەەۆ جۇرگىزدى.
